भांगरभूंय | प्रतिनिधी
मुख्यमंत्रीः ‘खाजन विकास आनी संवर्धन मंडळ’ स्थापन करपाची घोशणा
भांगरभूंय । प्रतिनिधी
पणजीः राज्य कर्मचारी भरती आयोगा वरवीं येत्या वर्सभरांत सरकारी खात्यांतलीं 2,500 रितीं पदां भरपा वांगडाच खाजन जमनींच्या संवर्धनाक ‘खाजन विकास आनी संवर्धन मंडळ’ स्थापन करपाची घोशणा मुख्यमंत्री डॉ. प्रमोद सावंत हांणी केली.
भारतीय स्वातंत्र्य दिसा निमतान पणजेच्या पोरण्या सचिवालया मुखार आयोजीत केल्ले राज्य पांवड्या वयले कार्यावळींत मुख्यमंत्री उलयताले. ह्या वेळार केंद्रीय मंत्री श्रीपाद नायक, विरोधी पक्ष फुडारी युरी आलेमांव, राज्यसभा खासदार सदानंद शेट तानावडे, मंत्री बाबूश मोन्सेरात आनी हेर मानेस्त हाजीर आशिल्ले.
आयज गोंयची सगळेच बाबतींत नेटान उदरगत जायत आसा. प्रधानमंत्री नरेंद्र मोदी हांणी 2047 मेरेन विकसीत भारत करपाचें सपन पळयलां. ते खातीर विकसीत भारत आनी विकसीत गोंय खातीर गोंयकारांनी पुराय योगदान दिवपाक जाय, अशें मुख्यमंत्री डॉ. सावंत हांणी म्हणलें.
राज्यांतल्या शिक्षणीक मळार बरें बदल जावपाक लागल्यात. ताचो फायदो गोंयांत शिकपी तीन लाखां परस चड विद्यार्थ्यांक जावपाक लागला. कुशळटाय शिक्षण दिवन विद्यार्थ्यांक स्वावलंबी करपाच्या हेतान सरकार वावुरता. ते खातीर फुडाराक गोंयांतल्या सगल्या सरकारी आयटीआयची उदरगत जातली. थंय आधुनीक तंत्रज्ञान उबारतले अशें मुख्यमंत्र्यान सांगलें. शेतकी मळार बदल आनी नव्या येवजण्यां वरवीं राज्यांत शेतकी उत्पादन वाडत आसा. फुडल्या काळांत फोंडें आनी वाळपय शेतकी कार्यालयां स्थापन करतले अशें आश्वासन मुख्यमंत्र्यान दिलें. राज्यांतली प्रशासकीय वेवस्था घटमूट करपाचें काम सुरू आसा. ते प्रमाण णव तालुक्यांनी नवीन प्रशासकीय इमारती उबारतले अशें तांणी सांगलें. तशेंच राज्यांत बेगीनूच पशुपालन म्हाविद्यालय स्थापन करतले आनी 19 डिसेंबराक राज्यांक शंबर टक्के साक्षर राज्य जाहीर करतले अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
