भांगरभूंय | प्रतिनिधी
कोलकाता खून प्रकरण : देशव्यापी संपांत गोंयचे दोतोर घेतले वांटो
– आपत्कालीन सेवा चालू उरतल्यो
– फार्मसी, आयुर्वेद, नर्सीचो संपाक तेंको
– दोतोरांचो पणजे आयज मूक मोर्चो – गोमॅकॉच्या दोतोरांचें आंदोलन
भांगरभूंय । प्रतिनिधी
पणजी : कोलकाताच्या महिला दोतोराचो बलात्कारा उपरांत खून करपाचे घडणुकेच्या निशेधा खातीर भारतीय वैजकी संघटणेच्या संपांत गोंयचे दोतोर लेगीत वाटेकार जातले. गोंयांतले 1,200 दोतोर आयज (17 ऑगस्टाक) ओपीडी बंद दवरतले. तशेंच घडणुकेचो निशेध आनी दोतोरांक संरक्षण दिवपाचे मागणे खातीर आयज सकाळीं 9 वरांचेर पणजे दोतोरांचो मूक मोर्चो जातलो. पणजे आझाद मैदान ते पोरणें गोंय वैजकी म्हाविद्यालय इमारती मेरेन हो मोर्चो काडटलो. ह्या मोर्चांत दोतोरां सयत फार्मसिस्ट तशेंच नर्सी वांटेकार जातल्यो. आपत्कालीन सेवा मात चालू उरतल्यो, अशें भारतीय वैजकी संघटणेच्या (आयएमए) गोंय फांट्यान स्पश्ट केलां.
भारतीय वैजकी संघटणेच्या गोंय फांट्याचे अध्यक्ष डॉ. संदेश चोडणकार हांणी पणजे पत्रकार परिशद घेतली. हे पत्रकार परिशदेक डॉ. शेखर साळकार, आदले अध्यक्ष डॉ. पराग प्रभुदेसाय, दात वैजकी संघटणेचे अध्यक्ष डॉ. अनील डिसिल्वा, नर्सींग संघटणेची अध्यक्ष निलिमा राणे, गोंय आयुर्वेद संघटणेचे डॉ. धर्मेंद्र प्रभुदेसाय, डॉ. देवदत्त सैल, फार्मसी संघटणेचे सचीव प्रसाद तांबा, कॅमिस्ट आनी ड्रगिस्ट संघटणेचे डॉ. राज वैद्य हाजीर आशिल्ले. ह्या संपांत गोंयांतल्यो फार्मसी संघटणा, आयुर्वेदीक संघटणा, नर्स संघटणा हांणी तेंको दिला. गोंय वैजकी म्हाविद्यालयांतल्या रेसिडेन्ट दोतोर (गार्ड) संघटणा लेगीत संपांत वांटेकार जातली.
कोलकातांत महिला दोतोराचेर बलात्कार करून खून करपाची दुदैवी घडणूक घडली. हें प्रकरण सीबीआय कडेन दिला आसले तरी अजून दुबविताक अटक जावंक ना. प्रकरणाचो तपास बेगिनात बेगीन जावन दुबाविताक अटक जावपाक जाय. हॉस्पिटलांत काम करपी दोतोर गोंयांत लेगीत सुरक्षीत नात. तपास बेगिनात बेगीन पुराय करून दुबावीत वा गुन्यावकाराक अटक जावपाक जाय. हे मागणे खातीर गोंयांतल्यो ओपीडी सेवा आजय सकाळीं 6 ते आयतारा सकाळीं 6 मेरेन बंद दवरतले. भारतीय वैजकी संघटणेच्या देशव्यापी संपांत गोंयचे दोतोर लेगीत वाटो घेतले, अशें डॉ. संदेश चोडणकार हांणी सांगलें. आपत्कालीन सेवा वांगडाच आपत्कालीन ऑपरेशनां जातलीं, अशेंय तांणी सांगलें. फार्मसी सुरू उरतल्यो मात आमचो संपाक तेंको आसा, अशें फार्मसी संघटणेचे सचीव प्रसाद तांबा हांणी सांगलें.
गोंय वैजकी म्हाविद्यालय दोतोरांचो संप
देशव्यापी संपाक तेंको दिवपा खातीर गोंय वैजकी म्हाविद्यालयाचे विद्यार्थी तशेंच दोतोरांनी बिरेस्तारा संप केलो. हाका लागून ओपीडींतल्या दुयेंतीक मार बसलो. आयसीयू तशेंच हेर सेवा चालू उरतल्यो, अशें गार्ड संघटणेन स्पश्ट केलां.
भलायकी केंद्रांतल्यो ओपीडी चालू
गोंयांतल्या भलायकी केंद्रांनी ज्यो ओपीडी आसात, त्यो मात चालू उरतल्यो. भलायकी केंद्रांतले वैजकी अधिकारी सरकारी अधिकारी आशिल्ल्यान तांकां सेवा दिवची पडटली, अशी म्हायती डॉ. शेखर साळकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
