भांगरभूंय | प्रतिनिधी
शिक्षण खात्या कडल्यान तयारी लेगीत सुरू
भांगरभूंय । प्रतिनिधी
पणजीः फावंडेशन पातळी आनी णववे उपरांत फुडल्या शिक्षणीक वर्सांत तिसरी, सवी आनी धावी ह्या वर्गां खातीर नव्या शिक्षणीक धोरणाची (एनईपी) अंमलबजावणी करपाचो विचार गोंय सरकारान चलयला. शिक्षण खात्यान आतांच्यानूच ते विशींची तयारी लेगीत सुरू केल्या.
केंद्र सरकारान देशभरांत ‘एनईपी’ची अंमलबजावणी करपाचो निर्णय घेतले उपरांत गोंय सरकारान गोंयांत तत्काळ ते नदरेन हालचाली सुरू केल्यात. पोरूं फावंडेशन पातळीचेर नव्या धोरणाची अंमलबजाणी केले उपरांत अंदूं यत्ता णववी खातीर धोरण चालीक लायल्या. ते उपरांत आतां फुडल्या शिक्षणीक वर्सांत तिसरी, सवी आनी धावी खातीर ह्या धोरणाची अंमलबजावणी करपाचो विचार करून शिक्षण खात्यान ते संबंदांतली तयारी लेगीत आतांच्यानूच सुरू केल्या, अशी म्हायती शिक्षण संचालक शैलेश झिंगडे हांणी शुक्रारा ‘भांगरभूंय’ कडेन उलयतना दिली. फावंडेशन पातळी ते विद्यापिठा मेरेन ‘एनईपी’चे अंमलबजावणेक गोंयाक 2030 मेरेनची मुजत आशिल्ल्याचेंय तांणी सांगलें. मजगतीं, केंद्र सरकाराच्या निर्देशा प्रमाण ‘एनईपी’ची अंमलबजावणी करपी गोंय देशांतलें पयलें राज्य आशिल्ल्याचो दावो मुख्यमंत्री डॉ. प्रमोद सावंत हांणी खूब खेपे केला. फुडल्या दोन वर्सांत ते संबंदांतल्यो गरजेच्यो साधनसुविधा उबारतले, अशीय घोशणा तांणी विधानसभेच्या पावसाळी अधिवेशनांत केल्या.
अंदूं फावोसो वेळ नाशिल्लो
अंदूं यत्ता णववी खातीर ‘एनईपी’ची अंमलबजावणी करपाचें आदींच निश्चीत जाल्लें. पूण लोकसभा वेंचणुकेचे आचारसंहितेक लागून तयारेक फावोसो वेळ मेळूंक नाशिल्लो. ताकाच लागून आतां फुडल्या वर्सांच्यान तिसरी, सवी आनी धावी खातीर ‘एनईपी’ची अंमलबजावणी करपाचें थारावन आमी आतांच्यानूच तयारी लेगीत सुरू केल्या, अशें शिक्षण संचालक शैलेश झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
