भांगरभूंय | प्रतिनिधी
पणजी: मुख्यमंत्री डॉ. प्रमोद सावंत हांणी काल सरकारी खात्यां संबंदी लोकांच्यो कागाळी जाणून घेवपा खातीर ‘सीएम हेल्पलायन’ सुरू केली. लोकांक पारदर्शक सेवा दिवपाक आनी कागाळी वेळार सोडोवपा खातीर ही हेल्पलायन सुरू केल्या. भौशीक गाराणीं खात्याक राज्यपाल, मुख्यमंत्री, मुख्यसचीव, सचीव आनी हेर कचेरींतल्यान पत्रां, ई-मेल, ऑनलायन, व्हॉट्सऍप, टेलिफोन, हेलो गोंयकार अशा माध्यमां वरवीं कागाळी येतात.
लोकांच्यो कागाळी जाणून घेवपा खातीर आता ‘सीएम हेल्पलायन’ सुरू केल्या. तिचो नंबर ९३१९८२८५८१ असो आसा. सध्या ह्या नंबरा वेल्यान पुलीस, वीज, उदका स्त्रोत, भलायकी, बायलां आनी भुरगीं उदरगत, समाज कल्याण आनी भौशीक बांदकाम खात्या संबंदी कागाळी स्विकारतले. सोमार ते शुक्रारा सकाळीं ९.३० ते सांजेच्या ५.३० मेरेन लोकांनी कागाळी करच्यो. कागाळदारांक ७२ वरां भितर कागाळींच्या कारवाये विशीं म्हायती मेळटली.
आल्तिन जीएसटी भवनांत आयोजीत ‘सीएम हेल्पलायन’ लॉंच कार्यावळींत प्रधान वित्त सचीव डॉ. व्ही. कांदेवेलू, भौशीक गाराणीं सचीव सरप्रित सिंग गील, भौशीक गाराणीं संचालक प्रसाद वळवयकार, डीजीपी आलोक कुमार, नियोजन आनी सांख्यिकी संचालक विजय सक्सेना, उदकास्रोत संचालक प्रमोद बदामी, समाज कल्याण संचालक अजीत पंचवाडकार आनी हेर अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
