भांगरभूंय | प्रतिनिधी
दनपारच्या जेवणा उपरांत आमकां सुस्ती येता. न्हीद येता अशें दिसता. जेवणा उपरांत कांय मिण्टांची न्हीद घेतल्यार बरें दिसता हें लेगीत खरें. गोंयांत पुर्तुगेज टायमा सावन, गोंयकारांक दनपारचे आड पडपाची संवय आसा. हांगां पयलीं दनपरां 1 ते 4 जाय मेरेन दुकानां बंद दवरताले. पूण चडशे वरभरूच आड पडटाले. जर्नल ऑफ क्लिनिकल स्लीप मेडिसीनांत उजवाडाक आयिल्ल्या एका अभ्यासा प्रमाण दर दिसा दनपारच्या जेवणा उपरांत 15 मिनटां न्हीद घेतल्यार जागृताय, सृजनशीलताय वाडटा आनी काळजाची भलायकी सुदारता.
नॅशनल लायब्ररी ऑफ मेडिसीनांत उजवाडाक आयिल्ल्या अभ्यासा प्रमाण, दनपारां 5 ते 30 मिनटां न्हीद घेतल्यार मेंदवाक म्हायतीच्या ओव्हरलोडा पसून राखण मेळटा. ताका लागून ताण उणो जाता आनी मूड सुदारता. पूण दनपरां 1 वरां परस चड काळ न्हिद घेवपी लोकांक फायद्या परस चड लुकसाण जालां अशेंय ह्या अभ्यासांत दिसून आयलां.
ही बरी न्हीद चड लांब आसूंक फावना. ताच्या बऱ्या फायद्या खातीर ती अर्द वरा परस उणी आसप म्हत्वाचें.
दिसाच्या न्हिदेचे फायदे कितें?
न्हीद सारकी घेतल्यार जायते फायदे जावंक शकतात. कांय मिण्टां न्हीद घेतल्यार तुमची मानसीक आनी शारिरीक भलायकी सुदारूं येता. नॅशनल स्लीप फावंडेशनाच्या म्हणण्या प्रमाण कॉफी पियेवपा परस बरी न्हीद घेवप चड फायद्याचे.
० कामांत सुदारणा
० रोगप्रतिकार शक्त वाडटा
० स्मरणशक्त वाडटा
० ताण उणो जाता
० काळजाची भलायकी सुदारता
० सृजनशीलताय वाडटा
० मूड सुदारता
० पचनक्रिया सुदारता
स्लीप फावंडेशनाच्या मतान सादारणपणान न्हीद घेवपाचे जायते फायदे आसतात, पूण न्हीद चड वेळ घेतल्यार ताचे वायट परिणाम जावंक शकतात.
० मोटसाण वाडूंक शकता
० उच्च रगतदाब
० काळजाच्या दुयेंसांचो धोको वाडटा
० उदासीनताय आनी चिडचिडेपण येवंक शकता
० रातच्या वेळारची न्हीद इबाडूंक शकता
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
