भांगरभूंय | प्रतिनिधी
मडगाव, प्रतिनिधी : कोलवें पुलिसांनी खंडणी आनी नेण्ट्या चल्याच्या अपहरण प्रकरणांत दुबावीत मार्कोस मेनिनो डिसोझा (रा. बेताळभाटी) हाका अटक केल्या. दुबाविता कडल्यान गुळयां सयत दोन पिस्तोलां जप्त केल्यांत.
मेळिल्ले म्हायती प्रमाण, बेताळभाटीच्या जुलिका फर्नांडीस ई टेलेस हांणी कोलवा पुलीस स्टेशनार कागाळ नोंद केल्ली. कागाळी प्रमाण ८ ऑगस्टाक सुमार दोन वरांचेर दुबावीत मार्कोस हाणें कागाळदार जुलिका आनी तिच्या नेण्ट्या चल्याक घराक कुलूप घालून भितरूच दवरलीं. उपरांत दुबावितान तांकां वायट उतरां दिलीं आनी मारून उडोवपाची धमकीय दिली. उपरांत तो नेण्ट्या चल्याक घेवन गेलो आनी सुटके खातीर मार्कोस हांणी जुलिका हांचे कडेन सात लाखांची मागणी केली. कागाळदार बायल पयशे दिवपा खातीर गेली तेन्ना तांणी तिचो विनयभंग केलो. चवकशे वेळार पुलिसांनी बुधवारा मार्कोस हाका ताब्यांत घेतलो आनी दोन पिस्तुलां सयत गुळयो जप्त केल्यो. पुलिसांनी मार्कोस हांचे आड खंडणीची मागणी करप, नेण्ट्या चल्याचें अपहरण करप आनी शस्त्र बाळगिल्ले खातीर गुन्यांव नोंद केलो.
उपरांत बिरेस्तारा सकाळीं मार्कोस डिसोझा हाका अटक केली. क्रिप्टो चलन आनी क्रिप्टो मायनिंग मशीन वेपारा खातीर कागाळदाराच्या चल्याचो वापर केल्लो. ह्याच ट्रेडींग आनी डिलच्या वादांतल्यान हो प्रकार घडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
