भांगरभूंय | प्रतिनिधी
नवी दिल्ली, खबरां संस्था ः संवसारीक भलायकी संघटनेन (WHO) बुधवारा एमपोक्स (Mpox) वा मंकीपॉक्स (Monkeypox) ही संवसारीक भौशीक भलायकी आणीबाणी अशें जाहीर केलां. दोन वर्सांत ह्या दुयेंसाक भलायकी आणीबाणी जाहीर करपाची ही ही दुसरी फावट. काँगोंत ह्या दुयेंसाचो प्रकोप जाला आनी ताका लागून शेजारच्या देशांकय ताचो फटको बसला.
मंकीपॉक्स हो देवी सारको व्हायरसाचो दुयेंस. ह्या व्हायरसाची लागण जाल्यार चड करून ताचे जायते दुश्परिणाम जायनात, पूण कांय प्रकरणांनी तो जीवघेणो थारूंक शकता. ताका लागून फ्लूसारकीं लक्षणां दिसतात आनी कुडीचेर पूं भरिल्ले फोड येतात. हो व्हायरस ऑर्थोपॉक्स व्हायरस वंशाचो वांगडी आसा.
मंकीपॉक्सच्या वेगवेगळ्या प्रकोपांत मरण येवपाचें प्रमाण वेगवेगळें आशिल्ल्यान डब्ल्यूएचओक ताचो हुस्को आसा. जायते फावटीं तो 10% परस चड आशिल्ल्याचें दिसून येता. तो एक संसर्गजन्य दुयेंस आशिल्ल्यान चड धोक्याचो थारूंक शकता. ते खातीर डब्ल्यूएचओन हे संबंदी उंचेल्या पांवड्यार अलर्ट जारी केला.
आफ्रिकेंत आतां मेरेन 17 हजारां परस चड एमपॉक्सचे दुयेंती
आफ्रिका सेंटर फॉर डिजीज कंट्रोल अँड प्रिवेंशन (आफ्रिका सीडीसी) हांचे मतान अंदूं आतां मेरेन आफ्रिका खंडांत एमपॉक्सचे 17 हजारां परस चड दुबावीत दुयेंती मेळ्ळ्यात, जाल्यार 517 जाणांक मरण आयलां. फाटल्या वर्साच्या ह्याच काळाच्या तुळेंत अंदूं 160 टक्क्यांनी दुयेंती वाडल्यात. वट्ट 13 देशांनी एमपॉक्सचे दुयेंती सांपडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
