भांगरभूंय | प्रतिनिधी
भारत 15 आॅगस्ट 1947 दिसा स्वतंत्र जालो. भारताक ब्रिटिश राजवटींतल्यान सुटका मेळ्ळी. 26 जानेवारी 1950 दिसा भारत प्रजासत्ताक जालो. तेन्नाच्यान हे दोनूय दीस भारतांत व्हडा उमेदीन आनी दबाज्यान मनयतात. 26 जानेवारीक तर व्हडलो दबाजो जाता. सैन्य दलांची प्रदर्शनां, कवायती, चित्ररथ प्रदर्शन, सांस्कृतीक कार्यावळी राष्ट्रपती भवना कडेन सुरू जावन इंडिया गेटीचेर सोंपतात. 15 आॅगस्ट आनी 26 जानेवारी ह्या दोन दिसांक भारतीय तिरंग्याचें ध्वजारोहण जाता. ह्या दोनूय दिसाच्या ध्वजारोहणाक दोन अर्थ आसात. दोन तरांनी हें ध्वजारोहण. 15 आॅगस्टाक तिरंगो हुबयता ‘flag hoisting’ आनी 26 जानेवारीक तिरंगो फडकयता ‘flag unfurling’. हीं दोन उतरां वेगळीं, तितलेंच तांकां म्हत्व आसा.
15 आॅगस्टाक तिरंगो हुबयता म्हणटात, कित्याक तर ब्रिटीश राजवटींतल्यान भारताक स्वातंत्र्य मेळ्ळें. 15 आॅगस्टा दिसा तिरंगो हुबयतात, तेन्ना ताची विशिश्ट तरेन घडी घालून ती खांब्याच्या पांया कडेन बांदतात. त्या समारोहाक येवपी मानेस्त बावट्याचे घडयेक बांदिल्ली दोरी मागीर ओडून बावटो वयर काडटा. वयर पावतकच दोरी नेटान ओडतकूच तिरंगो हवेन हुबयता. हाचें सांकेतीक म्हत्व म्हळ्यार खूब वर्सांच्या स्वातंत्र लढ्याक मेळिल्लें यश. दिल्लींत 15 आॅगस्टाक प्रधानमंत्री तिरंगो हुबोवप.
26 जानेवारीक भारत प्रजासत्ताक देस जालो. हाचोच संकेत दिवपाक ह्या दिसा तिरंग्याची घडी करून खांब्याच्या वयल्या पोंताक बांदून दवरतात. समारंभाचे मानेस्त येवन दोरी ओडून घडी सोडयतात आनी तिरंगो फडकायतात. प्रजासत्ताक दिसा तिरंगो फडकावचो मार राष्ट्रपतींचो आसता.
दोनूय घडणुको भारताच्या इतिहासांतल्यो म्हत्वाच्यो घडणुको. एक- आमच्या मायदेसाक स्वातंत्र्य मेळपाची आनी दुसरी आमचो देस अधिराज्य जावपाची. सगळ्या भारतीयांक स्वातंत्र्यदिसाचीं परबीं
प्रिता परब
9921382375
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
