भांगरभूंय | प्रतिनिधी
फोंडें: केळीनी- उसगांवां सुलभा इंजिनियरींग गॅरेजींत दुरुस्ती खातीर दवरिल्ल्या टेम्पो ट्रॅव्हलराक बुधवारा सकाळीं उजो लागलो. ह्या उज्यांत टेम्पो ट्रॅव्हरल पुराय लासलो. फोंडें उजो पालोवपी दळाच्या जवानांनी येवन उजो पालयलो. उजो शॉर्ट सर्किटाक लागून लागिल्ल्याचो दुबाव आसा. ह्या उज्यांत सुमार 10 लाख रुपयांचें लुकसाण जाल्ल्याचो दावो केला. मेळिल्ले म्हायती प्रमाण बुधवारा दनपारां 1.30 वरांच्या सुमाराक दुरुस्ती खातीर दवरिल्ल्या टेम्पो ट्रॅव्हलराक उजो लागलो. उजो लागलो तेन्ना गॅरेजींतले सगळे कामगार जेवपाक गेल्ले. गॅरेजींतल्यान धुंवयर येता तें शेजाऱ्यांक दिसले उपरांत धांवपळ जाली. कांय जाणांनी लागीं आशिल्ल्या उदकान उजो पालोवपाचो यत्न केलो. पूण टेम्पो ट्रॅव्हलराच्या टायरांक उजो लागिल्ल्यान उज्यान आनीक नेट घेतलो. गॅरेजींत दुरुस्ती खातीर दवरिल्ल्या हेर दोन ट्रकांचेर लेगीत कांय प्रमाणांत उज्याचो परिणाम जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
