भांगरभूंय | प्रतिनिधी
परवानगे बगर झाडां मारिल्ल्याचेंय उजवाडाक
भांगरभूंय । प्रतिनिधी
फोंडें: धारबांदोडें पंचायत वाठारांतल्या प्रतापनगरांत दोंगर कापणी प्रकरणांत समीर आनंद वाचासुंदर (पर्वरी) आनी धुल्लई वाठारांतल्या प्रकरणांत मनोहर घनश्याम गांवकार (दावकोण- धारबांदोडें) हांचे आड उपजिल्होधिकाऱ्यान कागाळ (चेक लिस्ट) नगरनियोजन खात्या कडेन दिल्या. जाल्यार नगरनियोजन खात्यान जमनीच्या धनयांक कारणां दाखय नोटीस जारी केल्या. तशेंच प्रतापनगरांत घरां बांदिल्ल्या 26 जाणां आड कागाळ दाखल जावपाची शक्यताय आसा.
धुल्लई वाठारांत मंगळारा घोळट्या पंगडान पळोवणी केले उपरांत सध्या प्रकरणांत घुस्पल्ल्या मनशांची राजकी आलाशिरो घेवचे खातीर धांवपळ चल्ल्या. खरी गजाल भायर सरिल्ल्यान प्लॉट खरेदी केल्ले मनीस सध्या संबंदितां आड फटवणुकेची रितसर कागाळ करपाची शक्यताय वाडल्या. तशेंच रान खात्या कडल्यान लेगीत जमनीच्या धनयां आड गुन्यांव नोंद जावपाची शक्यताय आसा.
धुल्लई वाठारांतल्या दोंगराचेर जमीन सपाट करून तयार केल्ले प्लॉट सध्या विकतात. खूब जाणांनी थंय प्लॉट घेतिल्ल्याचें उजवाडाक आयलां. मंगळारा घोळट्या पंगडान पळोवणी केले उपरांत बुधवारा रान खात्याचे अधिकारी गोपाळ जर्मी हांच्या मार्गदर्शना खाला पळोवणी करून पंचनामो केलो. जमीन सपाट करून खूबशीं झाडां मातये पोंदां पुरिल्लीं दिसतात. तशेंच खूबश्या झाडांचीं तोडां जमनीर पडल्यांत. कसलीच परवानगी नाशिल्ल्यान रान खात्याच्या अधिकाऱ्यांनी हे आदीं काम बंद केल्लें, अशें अधिकाऱ्यांनी स्पश्ट केलें. पूण प्लॉट विकपाच्या नादांत ह्या प्रकरणांत घुस्पल्ल्या मनशांनी बिनधास्त झाडां मारिल्ल्याचें दिसता.
मजगतीं, धारबांदोडेंच्या सरकारी कार्यालया कडल्यान फक्त दोन किलोमिटर अंतराचेर रानांत व्हड प्रमाणांत दोंगर कापून प्लॉट तयार केल्यात. फाटल्या एक- दोन वर्सांच्यान खूब जाणांनी थंय प्लॉय घेतल्यात, तशेंच घरां बांदचे खातीर चिरे हाडून उडयल्यात. बुधवारा म्हालाचे मामलेदार विमोद दलाल आनी हेर अधिकाऱ्यांनी घडणुकेचे सुवातेर वचून पंचनामो केलो. जमनीचे धनी आनी प्लॉट करून विकप्यांचेर खर कारवाय जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
