भांगरभूंय | प्रतिनिधी
मोपा : मोपा विमानतळार सेवा दिवपी पुलीस उपनिरीक्षकाचे सेवेंत आडखळ निर्माण करून तांकां मारपेट केल्ल्या प्रकरणांत मोपा पुलिसांनी सिद्धेश नारुलकार आनी समिल महाले ह्या पर्यटक टॅक्सी चालकां आड गुन्यांव नोंद केला.
मेळिल्ले चड म्हायती प्रमाण, सिद्धेश (रा : हाळी,चांदेल-पेडणें) आनी समिल उर्फ बंडो दिलीप महाले ( रा : उगवें- पेडणें) हे दोगूय टॅक्सी चालक विमानतळाच्या प्रवेशदाराचेर पर्यटकांची वाट पळयत उबे आशिल्ले. उपनिरीक्षक स्वप्नील किनळकार आनी कॉन्स्टेबल भगवान गवंडी सदां भशेन कामाक थंय पावले. मजगतीं, पुलिसांनी टावट्साचेर करपी कारवाये विशीं सांगून टॅक्सी चालकांक थंयच्यान वचपाक सांगलें. तेन्ना तांचे मदीं वाद सुरू जालो. ह्या वेळार दोनूय टॅक्सी चालकांनी पुलिसांक वायट उतरां दिवपाक सुरवात केली. कांय वेळार टॅक्सी चालकांनी उपनिरीक्षक स्वप्नील किनळकार हांचे छातयेर वार करून तांकां धुकल्लें आनी कामांत आडखळ निर्माण केली.
मजगतीं, उपनिरीक्षक किनळकार हांचे कडेन जाल्ल्या वादांत तांची नंबरप्लेट सांडली. तेच कागाळीच्या आदारान मोपा पुलिसांनी ऑन ड्यूटी पुलीस अधिकार्यांच्या कामांत आडखळ हाडिल्ल्या प्रकरणांत आनी ऑन ड्यूटी पुलीस अधिकार्यांचेर हात उबारिल्ल्या प्रकरणांत गुन्यांव नोंद करून दोग टॅक्सी चालकांक अटक केली. फुडलो पुलीस तपास निरीक्षक नारायण चिमुलकार हांच्या मार्गदर्शना खाला उपनिरीक्षक शशांका परब करता.
फाटल्या कांय काळा सावन गोंयांत येवपी पर्यटकांक टावट्सचे बरेच त्रास जातात. गोंयचे दोनूय विमानतळ, जायत्यो दर्यादेगो, शार आनी हेर सुवातांचेर टावट्स आसतात. हालींच बागा दिल्लीच्या पर्यटकाच्या खुनाक लागून गोंयच्यो ह्यो समस्या परत मुखार आयल्यात. हेच फाटभूंयेर गोंय पुलिसांनी परत टावट्सांचेर कारवाय करपाक सुरवात केल्या. फाटल्या वर्सा पुलिसांनी टावट्सांच्या कामांत गुंथिल्ल्या वट्ट ३३१ जणांचेर कारवाय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
