भांगरभूंय | प्रतिनिधी
कुडाळ, प्रतिनिधी : कुडाळा मावोडच्या लोकांनी जांवयाकूच विजेचो शॉक दिवन ताचो खून केलो. वसंत उर्फ सागर प्रभाकर भगे (३२) अशें मरण आयिल्ल्याचें नांव. वेंगुर्लें पुलिसांनी ताचे बायले सयत हेर तिगांक ताब्यांत घेतल्यात. हे विशीं वसंत भगे हांच्या भावान कागाळ दाखल केल्ली.
मेळिल्ले म्हायती प्रमाण, वसंत हो मुळचो माणगाव तळेवाडीचो. तो आनी ताची घरकान नुतन हांचे मदीं कांय कारणांक लागून वाद जाल्ल्यान नुतन कुळारा गेल्ली. दुबावितांनी १२ ऑगस्टाक जांवयाक आडेली सांतेरी गाळू हांगा मावोड्यां आपयलो. दुबावितांनी वसंत हाचो खून करपाच्या हेतान घरा भोंवतणच्या कंपावंडा लागसार लायटीच्या सरयांचें जाळें तयार केल्लें. वसंत नुतनाक मेळपाक गेल्ले कडेन तो त्या जाळ्याक तेंकलो आनी ताका मरण आयलें.
मजगतीं काल सकाळीं वसंत हाची कूड लागसारचे नर्सरी लागसारा मेळ्ळी. उपरांत गांवांत बरोच बोवाळ जालो.
वेंगुर्ला पुलिशेंत नोंद जाल्ले कागाळी प्रमाण, वसंत हांच्या भावान नुतन गावडेच्या कुटुंबान मुद्दाम विजेचो शॉक दिवन वसंत हाचो खून केल्ल्याचो आरोप केला. वसंत आनी ताची बायल नुतन हांचे मदीं सदांच झगडें पेट्टालें.
हे विशीं वेंगुर्ला पुलिसांनी वसंताची घरकान्न नुतन, मांव शंकर गावडे आनी माय पार्वती शंकर गावडे हांकां ताब्यांत घेतल्यां. तांचेर खुनाचो गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
