भांगरभूंय | प्रतिनिधी
नवी दिल्ली, खबरां संस्था ः जियो, एअरटेल आनी वोडाफोन सिम धारकांक आनीक एक व्हडलो धपको बसपाची शक्यताय आसा. कारण भारतीय दूरसंचार नियामक प्राधिकरण आनी जियो, एअरटेल आनी वोडाफोन कांय सिम कार्ड धारकां खातीर व्हड बदल करपाचे तयारेत आसात. देखून जायते फावटीं तुमका फोनाचेर फेक आनी स्पॅम कॉल येतात. अशा फेक कॉलांक लागून व्हड प्रमाणांत जायते गुन्यांव घडत आसात. 1 सप्टेंबर सावन अशा फेक आनी स्पॅम फोनांचेर बंदी घालपाचो व्हडलो निर्णय ट्रायन (Telecom Regulatory Authority of India) घेतला.
केंद्र सरकार 1 सप्टेंबर सावन एआय तंत्रज्ञानाचो (AI Technology) वापर करपाचे आसा. एआय तंत्रज्ञानाक लागून फेक आनी स्पॅम कॉल पुरायपणान बंद जातले. पूण आतां फुडलो नेम म्हणल्यार ज्या सिमांतल्यान अशे कॉल येतात ती कंपनीच गुन्यांवकार आसतली म्हळ्यार कोणेय जियो वा वोडाफोन सिम कार्ड वापरून फेक वा स्पॅम कॉल केल्यार ताका ती कंपनीच पुरायपणान जापसालदार आसतली.
आतां सिम कार्ड घेवपाचें आसल्यार ई व्हेरिफेकशन जातलें. ऑनलायन फटवणूक आनी पयशांच्या फटवणूकांतल्यान गिरायकांक सुरक्षा दिवपा खातीर सरकारान नेमांत बदल केल्यात. आतां ई व्हेरिफेकशनाक लागून सिम कार्ड घेवन फटवणूक करपाचे प्रकार बंद जातले. हाचे वांगडाच कांय जाण खाजगी क्रमांक घेवन मागीर टेलीमार्केटींग खातीर सिम कार्ड वापरतात, पूण 1 सप्टेंबर उपरांत अशे नंबर दोन वर्सां खातीर नंबर ब्लॅकलिस्ट जातले.
खंयच्याय गिरायकान एक नंबर फेक कॉल म्हूण कळयल्यार संबंदीत सिम कार्ड कंपनीचेर बेगोबेग कारवाय जातली. कंपनीन स्वता अशी कारवाय केल्यार फेक कॉल आनी स्पॅम कॉल बंद जातले अशें केंद्र सरकार म्हणटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
