गोंयचे दलाल

भांगरभूंय | प्रतिनिधी

हें दलाल (टाव्ट्स) प्रकरण आतां गळ्या मेरेन आयलां. सरकार आनी समाज दोगांयनी सादूर जायना जाल्यार गोंय त्रासांत पडटलें.

खंयच्याय पर्यटन थळाचेर गेलो काय थंयचे रिक्षाकार, टॅक्सीकार, लॉजकार, गायड, फोटोग्राफर धांवून येतात आनी तुमकां गिरायक घालपाची विनवणी (एके तरेन फोर्सार) करतात. भोवतेक सगल्यांकूच हो अणभव येता. हे सगले कायद्यान चलपी वा प्रामाणीक आसतातूच अशें ना. व्यक्ती तितल्यो प्रवृत्ती. आमच्या गोंयात मात असले प्रकार नाशिल्ले. हांगाचीं देवळां इतलीं शांत कशीं, हांगा कोणूच आमच्या फाटल्यान लागनात, अशें पर्यटक म्हणटाले. मात, आतां गोंयच्या कांय वाठारांनी ह्यो जळू सारक्यो प्रवृत्ती फाटीक लागिल्ल्यो दिसून येतात. चडशे बिगरगोंयकार हें वेगळें सांगपाक नाका! खास करून दर्यावेळांचेर ही भुरावळ पळोवपाक मेळटा. तातूंत बेकायदेशीर कृत्यां करपी दलालांचो (इंग्लिशींत ताका टाव्ट्स म्हणटात खंय) आंकडो वाडत आसा. ही हुस्क्याची गजाल. सरकारी यंत्रणांनी हाचे आड कडक पावलां उबारलीं नात, तर गोंयच्या पर्यटनाचें भेंड मोडले बगर रावचें ना.
पर्यटक गोंयांत आयलो काय दलाल ताका ‘माँगता है क्या?’ हो पयलो प्रस्न विचारतात खंय. म्हणल्यार चली, ड्रग्स. मागीर ताका सवाय भितर हॉटेल दिवपाचें उतर दिता. खंय सोरो सवाय मेळटा, तेंय सांगतात. गोंयांत पळोवपा सारकीं थळां खंय आसात, ताचीय म्हायती दितात. ताचे बदल्यांत तांकां हॉटेल, शॅक्स धनयां कडल्यान कमिशन मेळटा आसतलें. इतलें मेरेन बरें आसा, अशें म्हणुया. पूण, कांय दलाल पर्यटकाक सवाय दिवपाच्या नांवा खाला आडवाटेक व्हरतात आनी धमकावन वा बडोवन ताचे कडले पयशे काडून घेतात. ताचें एटीएम कार्ड रिकामी करपाक सांगतात. असल्या आरोपां खाला पोरूं कांय दलालांक अटक जाल्ली. तातूंत कांय वेटरूय आशिल्ले. फाटल्या सप्तकांत मात दलालांनी कहर केलो. बागा दर्यावेळेर एका 25 वर्सांच्या पर्यटकाक जिवेशींच मारलो, असो आरोप जाला. खून करपाच्या दुबावा वयल्यान तिगांक धरल्यात. शेनवारा दर्यादेगेर एक कूड उफेतना जिवरक्षकांक सांपडली. तिचेर सुरयेन केल्ले घाय आशिल्ले. पुलिसांक मेळिल्ले म्हायती प्रमाण, अदींमदीं कळंगूटे येवपी हो तरणाटो शुक्रारा रातीं उसरां बागा दर्यादेगेर एकटोच बशिल्लो. थंय हे दुबावीत दलाल आयले आनी तांणी ताचे कडेन वाद घालो. ताचे फाटल्यान अर्थांत कितें तरी कारण आसतलें वा ते नशेंत आसूं येता. मागीर मारपेट करून सुरयेन हल्लो केलो, असो आरोप आसा. ताका लुटपाक हो हल्लो जाला, असो पुलिसांक दुबाव. दर्यावेळेर रातच्या वेळार हाचे पयलीं 2- 3 चलयांचे खून जाल्यात. त्यो देश पांवड्याचेरूच न्हय, तर आंतरराष्ट्रीय मळाचेर गाजल्यात. गोंयाक बदनाम करून गेल्यात. ताका लागून कुटुंबाक घेवन वेळेर आयिल्ल्या गोंयकार वा पर्यटकान सूर्य दर्यात बुडपाक लागलो काय साटली पोटली कवळून थंयच्यान कडसरपाक जाय, अशें म्हणटात. एका काळार लाखांनी पर्यटकांक मोनेळ घालपी आमच्यो गोंयच्यो दर्यावेळो आयज खंय पावल्यात, ताची गोंयकारांनी कल्पना करची. दर्यावेळो? नाका रे बाबा… अशें म्हणपी पसून आयज हजारांनी पर्यटक आसतले.
विरोधी पक्षांनी ह्या प्रस्ना वयल्यान सरकाराचेर टिका केल्या. दर्यावेळारांचेर बेकायदेशीर कामां करपी दलालांचो आंकडो हालींच्या काळांत वाडटा, अशें ते म्हणटात. ही हुस्को करपा सारकी गजाल. ते घुंवळे वखदांची तस्करी, विक्री, खंडणी, शिंदळकी धंद्यांत सक्रीयपणान वांटेकार आसात, अशेंय विरोधकांक दिसता. सरकारी यंत्रणांक हें फट हें सिद्ध करपाक जमतलें? पर्यटन, गृह खातें, पुलिसांनी, थळाव्या पंचायतींनी, हॉटेल, गायड, शॅक्स संघटणांंनी दर्यावेळांचेर लक्ष दिवपाक जाय. पर्यटनाची खोस उपभोगपाक आयिल्ल्यांक कोणाचोच उपद्रव जावपाक जायना. हे दलाल फक्त दर्यावेळांचेर सक्रीय आसात. जर ते राज्याच्या हेर वाठारांनी आपलीं कर्मां करपाक लागले, जाल्यार कितें जातलें हाचो विचार प्रत्येकान करचो. हालीं गोंयांत प्रेमप्रकरणां वयल्यान खून पसून जावपाक लागल्यात. पर्यटक गोंयांत आयले काय तांकां सगले तरेची मजत दिवंक जाय ही गजाल खरी. पूण ते खातीर ती दिवपी प्रामाणीक आसूंक नाका? अपप्रवृत्ती भितर घुसल्यो जाल्यार मागीर कितें जाता, ताचें हें बागांतलें उदाहरण. ह्या दलाला कडेन वळखपत्र आसपाक जाय. तांची सरकारा कडेन नोंदणी जाय. तशें केल्यारूच कोणूय उठटा आनी दलाल जावन पर्यटकांक लुट्टा, हें बंद जातलें. नाजाल्यार ही दलाल संस्कृती बंदूच करपाक जाय. पर्यटकांनीय गोंयांत येतना वा हेर कडेनूय वतना बारीकसारीक म्हायती काडून वच्चें. आयच्या म्हायती तंत्रज्ञानाच्या युगांत हें कठीण न्हय.
हें दलाल (टाव्ट्स) प्रकरण आतां गळ्या मेरेन आयलां. सरकार आनी समाज दोगांयनी सादूर जायना जाल्यार गोंय त्रासांत पडटलें.