भांगरभूंय | प्रतिनिधी
21 वेर आयोजन: अभिनेतो मिलिंद गुणाजी आसतले हाजीर
पणजी: विकसिनी मंडळ आनी समाज कल्याण संचालनालय गोंय सरकार हांच्या जोड पालवान 21 तारखेक नंदनवन रिसोर्ट, ओपा, फोंड्यां सकाळी 9.30 क आंतरराष्ट्रीय ज्येश्ठ नागरीक दीस कार्यावळीचें आयोजन केलां.
मुखेल सोयरे म्हूण समाज कल्याण मंत्री सुभाष फळदेसाय, मानाचे सोयरे म्हूण अभिनेतो मिलिंद गुणाजी, विशेश निमंत्रीत म्हूण समाज कल्याण संचनालयाचे संचालक अजीत पंचवाडकार, तशेंच विकासिनी मंडळाच्यो अध्यक्षा ज्योती कुंकळकार हाजीर आसतल्यो. सत्रा उपरांत 10.35 क. मिलिंद गुणाजी हांची मुलाखत ज्योती कुंकळकार आनी मनस्विनी प्रभुणे नायक घेतलीं. 11.15 क. डॉ. पद्मनाभ राताबोली मार्गदर्शन करतले. 11.30 ते 1.30 मेरेन ‘साठी जातकच आनंदी आयुश्य कशें जगप’ आनी ‘ज्येश्ठ नागरिकां मदींय आव्हानां’ ह्या विशयाचेर चर्चासत्र जातलें. जेवण जातकच दनपारां 2.35 क. डॉ. संदीप लवंदे मार्गदर्शन करतले. नितीन कोरगांवकार आनी पंगड संगिताची कार्यावळ सादर करतले.
विशेश चर्चासत्र: ‘साठी जातकच आनंदी आयुश्य कशें जगप’ ह्या विशयाचेर आयोजीत चर्चासत्राचे अध्यक्ष ‘गोमन्तक’चे संपादक संचालक राजू नायक आसतले जाल्यार चर्चासत्रांत डॉ. पांडुरंग फळदेसाय, गोरख मांद्रेंकार, अनील प्रियोळकर, रमेश नायक, सुहास प्रभू, दया मित्रगोत्री, संगीता म्हापणे वांटेकार जातलीं. ‘ज्येश्ठ नागरिकां मुखा वेलीं आव्हानां’ ह्या विशयाचेर चर्चासत्राचे अध्यक्ष आदले केंद्रीय कायदो मंत्री ड. रमाकांत खलप आसतले जाल्यार ह्या चर्चासत्रांत वसंत प्रभुदेसाय, श्रीधर कामत बांबोळकार, मीना काकोडकार, डॉ. जयंती नायक, सागर पानवेलकार, माया खरंगटे, आशा वेर्णेंकार वांटेकार जातलीं. ह्या पुराय कार्यावळीचें सुत्रसंचालन रजत हेगडे करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
