ताज आग्वाद सड्यार रिसोर्ट उबारपा खातीर आयएचसीएल, गोंय सरकारां मदीं कबलात

भांगरभूंय | प्रतिनिधी

पणजीः सिकेरी ताज आग्वाद सड्यार कायदेशीर सोपस्कार पुराय जाले उपरांत ह्या सड्यार रिसोर्ट उबारपा खातीर गोंय सरकार आनी आयएचसीएल वांगडा समजिकायेची कबलात जाल्या. ही सुवात भलायकी आनी सांस्कृतीक पर्यटनाची मोख दवरून आयएचसीएलचे ताज हांगा 3 लाख स्क्वेर मिटर सुवातीचेर रिसोर्ट बांदतले. सरकारान ही सुवात 47 वर्सां खातीर लिजार दिल्या आनी ताज सरकाराक सुरवेक दर वर्सा रु. 1 कोटी महसूल दितले.
मुख्यमंत्री डॉ प्रमोद सावंत, पर्यटन मंत्री रोहन खंवटे, वित्त सचीव डॉ. चंदावेलू, पर्यटन खात्याचे संचालक सुनील अन्चपिका, आयएचसिएलचे प्रतिनिधी पुनीत चाटवाल आनी आयएचसिएलचे हेर अधिकारी हांचे हाजिरेंत ही कबलात जाली.
जो जमीनचो विशय 1997 वर्सा सावन आडखळून उरिल्लो तो सुटावो जाल्ल्यान खूब खोस भोगता. आयएचसीएलान घेतिल्लो फुडाकार आनी सहकार्याक लागून हें शक्य जालां, अशें मुख्यमंत्री डॉ प्रमोद सावंत हांणी सांगलें.
रु. 10 कोटींचो महसूल आयएचसिएलान पयलींच सरकाराक दिला आनी उरिल्लो रु. 12 कोटींचो महसूल हो समजिकायेची कबलात जाले उपरांत दितले. राज्याक महसुलांत कसलेंच लुकसाण सोसनासतना ही कबलात जाल्या. आयएचसीएला कडल्यान सुरवेक आपल्या महसुलाचो 5 टक्के भाग, म्हणजेच वर्साक दरेक एक कोटी महसूल सरकाराक येतलो. तशेंच जी 44 कोटी कळंतर आसा तें लेगीत ही कंपनी भरतली अशी म्हायती मुख्यमंत्र्यांनी दिली.
हो प्रलंबीत प्रकल्प अडेज वर्सा भितर पुराय करून 2026 वर्सा पयली तुमच्या रिसोर्टाचो पयलो पांव़डो तयार करून ताचे उक्तावण करात. 2027 वर्सा गोंय विधानसभेची वेंचणूक जावपाची आसा आनी आमी आश्वासनांची पुर्ततार केल्या हे लोकांक आमकां दाखोवन दिवंक जाय अशें मुख्यमंत्र्यांनी आयएचसीएल हांकां सांगलें.
27 वर्सा आडखळून उरिल्लो प्रकल्प सत्यात येता हो एक अविश्वसनीय खीण जावन आसा, आनी स्वातंत्र दिसाचे तीन दीस पयलीं ही कबलात जावन हो एक शूभ योग आसा, अशें आयएचसिएलचे पुनीत चाटवाल हांणी सांगलें.
आयएचसिएल टाटा समुहाची सगल्यांत पोरणी कंपनी. हे कंपनीन 1903 वर्सा ताज मुंबई हें पयलें हॉटेल बांदून सुरवात केली आनी ताका 120 वर्सां पुराय जातात. हो प्रकल्प वेवसायांक एकठांय हाडून समाज आनी गोंयाक योगदान दिता.
मुख्यमंत्र्याच्या फुडारपणाक लागून ह्या आडखळींचेर आमकां जैत मेळोवप शक्य जालें अशे चाटवाल हांणी सांगलें.
16 वेळ्यागवेगळ्या ब्रॅण्डा खाला गोंयांत आमचीं 16 हॉटेलां आसात तातूंंतलीं 11 चालीक लागल्यांत. आमच्यो 22 होम स्टे आसा. 37 नव्या हॉटेल प्रकल्पाचें काम चलता. अशे करून आमचे कडेन 53 हॉटेल प्रकल्प आसात आनी हो कबलात जाल्लो प्रकल्प हो आमचो 54 वो प्रकल्प. हे कंपनीन फोर्ट आग्वाद म्हूण गोंयचे पयले लक्झरी हॉटेल बांदिल्लें तेंच हॉटेल आतां गोंयचे फुडल्या 50 वर्सा खातीर निवेश करतले, अशें चाटवाल हांणी सांगलें.