भांगरभूंय | प्रतिनिधी
भारताचो स्वातंत्र्यदीस 15 आॅगस्टाक मनयतात. प्रधानमंत्री लाल किल्ल्या वयल्यान बावटो हुबयतात. 15 आॅगस्ट 1947 दिसा भारताक ब्रिटीशांच्या गुलामगिरींतल्यान स्वातंत्र्य मेळिल्लें. लाॅर्ड मावंटबेटन तेन्ना निमणे व्हायसराॅय. तांणीच भारताक स्वातंत्र्य दिवपाची घोशणा केली. मात, 15 आॅगस्टाकूच स्वातंत्र्यदीस कित्याक मनयतात? हीच तारीख कित्याक वेंचून काडली? ते फाटलें कारण कितें?
ब्रिटीश संसदेन लाॅर्ड मावंटबेटन हांकां 30 जून 1948 मेरेन भारताची सत्ता भारतीयांक दिवपाचे अधिकार दिल्ले. तांकां 1947 वर्सा भारताचे निमणे व्हायसराॅय म्हूण नेमिल्ले. तांणीच 15 आॅगस्ट ही तारीख वेंचून काडिल्ली. कांय जाणकारांच्या मतान, सी. राजगोपालचारी हांचें म्हणणें आशिल्लें की, जर 30 जून 1948 मेरेन वाट पळोवची पडली जाल्यार हस्तांतरीत करपाक खंयचीच सत्ता उरची ना. हाचोच विचार करत मावंटबेटन हांणी 15 आॅगस्टाक भारताक स्वातंत्र्य दिलें. कांय जाणांचें म्हणणें की 15 तारीख शुभ मानतात. ताका लागून हो दीस वेंचून काडलो. साबार लोकांचीं वेगवेगळीं मतां आसात.
ब्रिटीशांनी स्वातंत्र्य दिवपाचें थारायतकच ब्रिटीश हावस आॅफ काॅमनांत 4 जुलय 1947 इंडियन इंडिपेंडेंस बिल सादर केलें. ह्या बिलांत भारताची फाळणी आनी पाकिस्तानाक वेगळो देश करपाचो प्रस्ताव दवरिल्लो. हें बिल 18 जुलय 1947 दिसा स्विकारलें. 14 आॅगस्टाक फाळणी जाली. पाकिस्तान देश निर्माण जालो. 15 आॅगस्टाक मध्यानरातीं 12 वरांचेर भारत देश स्वतंत्र जाल्ल्याची घोशणा केली.
दरवर्सा प्रधानमंत्री लाल किल्ल्याचेर तिरंगो हुबयतात. देशाक उद्देशून भाशण करतात. मात, भारताचे पयले प्रधानमंत्री पं. जवाहरलाल नेहरू हांणी 16 आॅगस्ट 1947 दिसा लाल किल्ल्या वयल्यान बावटो हुबयिल्लो.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
