ड्रंक अ‍ॅण्ड ड्रायव्ह अपघाता उपरांत जीपीक उजो

भांगरभूंय | प्रतिनिधी

म्हापशें, प्रतिनिधी ः ड्रंक अ‍ॅण्ड ड्रायव्ह अपघाता उपरांत गाडयेक उजो लागलो पूण प्रशासकीय यंत्रणा मजती खातीर पावली ना. हाका लागून जीप ड्रायव्हरान चार जाणांनी लुटून अडेज लाखांची रोख रक्कम चोरून व्हेली अशें नाटक करून पुलिसांक फटयले. असगांवांत घडिल्ले हे घडणुकेंत गाडी उज्यांत लासली.
मंगळारा दनपारां 2 वरांचे सुमाराक आसगांवच्या चर्चा लागसार हो अपघात दुर्घटना. मुळ हरियाणाचो नीरज सौरव हो जीए 04 सी 2134 क्रमांकाच्या बोलेरो जीपांतल्यान म्हापशें ते हणजुणां वटेन वतालो. वाटेर आसगांव चर्चे लागसारच्या ओल्तार गाडयेवेलो ताबो गेलो आनी जीपीन रस्त्या कुशीक धपको दिलो आनी रस्त्यार उमथली.
ते उपरांत नीरजान काच फोडून भायर सरलो. ह्या अपघातांत ताका किरकेळ जखम जाल्या. तो सोऱ्याचे घुंवळेत आशिल्लो. अपघाता उपरांत ताणें प्रशासकीय यंत्रणाक आपत्कालीन क्रमांकाचेर फोन केलो. पूण बरोच तेंप मजत करपाक खंयचीच यंत्रणा थंय आयली ना. तेन्नाच जीपाक उजो लागलो. मजत करपाक प्रशासकीय यंत्रणा वा पुलीस येना हें पळोवन ताणें परतून आपत्कालीन क्रमांकाचेर फोन केलो आनी चार अनवळख्यांनी आपणाक लुटून देड लाख रुपया चोरल्यात अशें सांगलें.
ते उपरांत म्हापशें उजो पालोवपी दळ आनी हणजुणा पुलीस घडणुक थळार पावले. उजो पालोवपी दळाचे उपअधिकारी ज्ञानेश्वर सावंत हांच्या फुडारपणा खाला शाहू शेळके, एम. एच. चोडणकार, व्ही.आर. नायक आनी व्ही.आर. पाळणी ह्या जवानांनी उजो पालयलो पूण तो मेरेन पुराय गाडी उज्यात लासिल्ली.
पुलिसांनी नीरज सौरव हाका चवकशी खातीर ताब्यांत घेतलो. ते भायर ताच्या भावाकूय आपोवन चवकशी केली. तेन्ना ताणें नीरजाक कसलीच रोख रक्कम दिवंक ना अशें सांगलें. ते उपरांत पुलिसांनी परतून चवकशी केली तेन्ना मजतीक आपत्कालीन प्रशासकीय वेवस्था बरोच तेंप थंय पावूंक नाशिल्ल्यान आपत्कालीन क्रमांकाचेर संपर्क केलो आनी लुटमार केल्ल्याचें फट सांगिल्ल्ल्याचे तांणे कबूल केलें. पुलीस निरिक्षक परेश नायक हांच्या फुडारपणा खाला पुलीस फुडली चवकशी करतात.