भांगरभूंय | प्रतिनिधी
देशप्रेमींनी उक्तायली तिडक: पार्टी आयोजनाचे तकटे काडून उडयले
पेडणें, प्रतिनिधी: स्वातंत्र्य दिसा निमतान मोरजे दर्यादेग वाठारांत तशेंच चोपड्यां पार्ट्यांचें आयोजन केल्ले तकटे मेकळेपणान लायिल्ल्याचें दिसून येता. थळाव्या पंचायतींची कसलीच परवानगी घेवंक नाशिल्ल्यान आगरवाडा चोपडेंचे सरपंच सचिन राऊत हांणी हे विशीं दखल घेवन हे बॅनर काडले.
हे विशीं उलयतना वसंत विद्यालयाचे मुख्याध्यापक सूरज चोडणकार हांणी राष्ट्र विरोधी कृतीचो खर शब्दांनी निशेध केलो. देशाचो स्वातंत्र दीस आमी सगळे उमेदीन मनोवपाक तयार आसात. ‘हर घर तिरंगा’ स्लोगन घेवन शाळा, कॉलेजींतलीं विध्यार्थी रॅली काडून स्वातंत्र्य दिसाची जागृती करता. स्वातंत्र दिसाचें उमेदी वातावरण सगळे कडेन पातळिल्लें आसतना चोपडें तिठ्यार मात बायलांचीं नागडीं, उगडीं चित्रां आशिल्लीं, स्वैराचाराचे प्रदर्शन घडोवपी पार्ट्यांचीं बॅनरां सगळे कडेन लायिल्लीं दिसतात. हे पवित्र भूंयेर, पवित्र दिसा अशे तरेच्या पार्ट्यांचें आयोजन जावप दुर्दैवी आसा. असल्या देश विघातक कृतीचो दरेका देशप्रेमी नागरिकांनी निशेध करपाक जाय. राष्ट्रीय तिरंग्याचो गैरवापर आडावपाक जाय. भारताचो स्वातंत्र्य दीस असले विकृत तरेन मनोवपी प्रवृतीक आळाबंद घालपा खातीर देशप्रेमी नागरिकांनी एकठांय येवपाची गरज आसा, अशें तांणी सांगलें.
आगरवाडो- चोपडेंचे सरपंच सचिन राऊत हांणी म्हणलें, थळाव्या पंचायतींक काळखांत दवरून अशे तरेच्या पार्ट्यांची जायरात करपी बॅनर चोपडें तिठ्यार झळकतात. मात स्वातंत्र्य दिसा निमतान नंगा नाच आयोजीत करप म्हळ्यार स्वाभिमानी नागरिकांचो अपमान. ह्या पार्ट्यांतल्यान तशेंच बॅनरां वरवीं विध्यार्थ्यांक खंयचो संदेश वतलो हाचो विचार जावपाक जाय. हांकां कोणाचीच परवानगी नासतना हें कशें खपोवन घेतात काय? असो प्रस्न करून जिल्लोधिकार्यांनी हाचेर कारवाय करपाची मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
