भांगरभूंय | प्रतिनिधी
नवी दिल्ली, खबरां संस्था: कर्मचारी फुडार निर्वाह निधी संघटणेन (EPFO) कर्मचार्यांक जावपी समस्यांचेर कायमचो उपाय सोदून काडला. कर्मचार्यांक खंयच्याच समस्यांक तोंड दिवचें पडचें न्हय म्हणून आतां ईपीएफओ जायते नेम बदल्ल्यात. ईपीएफओन वैजकी, शिक्षण, लग्न, घर घेवप वा बांदप अशा कामां खातीरच्या ऍडव्हान्स क्लेमां खातीर ऑटो-मोड सेटलमेंटची सुविधा दिल्या. ज्या पीएफ खातेधारकांचें उत्पन्न ६ कोटीं परस चड आसा, ते सगळे हे सुविधायेचो लाव घेवपाक शकतात. ही एक अशी सुविधा आसा, जी आपत्कालीन परिस्थितींत पीएफ धारकांक निधीची पुरवण करपाक शकता.
आदीं ईपीएफओचे हे सुविधाये खातीर दावो करपाक १५ ते २० दीस लागताले, पूण आतां हाका फकत ३ ते ४ दीस लागतात. वांगड्याची पात्रताय, कागदपत्रां, ईपीएफ खात्याचो केवायसी स्थिती, बँक खातीं आदी तपशील तपासले म्हणून ताका इतलो वेळूय लागलो. पूण, आतां स्वयंचलीत प्रणालींत तांकां चवकशी आनी मान्यताये खातीर धाडटात, जाका लागून दावो करप सोंपें जाता.
कोण करपाक शकता दावो ?
आपत्कालीन परिस्थितींत ह्या निधीच्या क्लेम सेटलमेंटा खातीर ऑटो मोड एप्रील २०२०त सुरू केल्लो. मात तेन्ना दुयेंत आसल्यारूच पयशे काडपाक मेळटाले. आतां ताची व्याप्ती वाडयल्या. दुयेंस, शिक्षण, लग्न आनी घर खरेदी करपा खातीर तुमी ईपीएफांतल्यान पयशे काडूंक शकतात. तशेंच घरांत भयण आनी भावाचें लग्न जाल्यार तांकांय पयलींच पयशे काडून घेवंक मेळटा.
कितले पयशे काडूंक मेळटात?
आतां ईपीएफ खात्यांतल्यान एक लाख रुपया मेरेन काडूं येतात, जाल्यार पयलीं ही मर्यादा ५० हजार रुपया आशिल्ली. ऑटो सेटलमेंट मोड संगणका वरवीं पयलींच निधी काडूं येता. ताका कोणाचीय परवानगी घेवची पडना आनी तीन दिसां भितर पयशे तुमच्या खात्यांत जमा जाता. हे खातीर केवायसी, दाव्याची विनंती करपाची पात्रताय, बँक खात्याचो तपशील गरजेचो आसता.
पयशे कापडची प्रक्रिया
-सगळ्यांत पयलीं UAN आनी पासवर्ड वापरून EPFO पोर्टलाचेर लॉगीन करात.
-आतां तुमकां ऑनलायन सेवांचेर वचून ’क्लेम’ सेक्शन निवडचो पडटलो.
-बँक खातें व्हेरिफाय करात.
-प्रोसीड फॉर ऑनलायन क्लेमाचेर क्लिक करात.
-जेन्ना नवी पेज ओपन जातली तेन्ना पीएफ डव्हान्स फॉर्म ३१ निवडचो पडटलो.
-आतां पीएफ अकावंट सिलेक्ट करात.
-आतां तुमकां पयशे काडपाचें कारण, कितले पयशे काडपाचे आनी पत्तो भरचो पडटलो.
-उपरांत बँकेचो चेक वा पासबुकची स्कॅन कॉपी अपलोड करची पडटली.
-उपरांत तुमकां संमती दिवची पडटली आनी आधार व्हेरिफाय करचें पडटलें.
-क्लेम प्रॉसेसे जाले उपरांत एम्प्लॉयरा कडेन अप्रुवला खातीर वतलो.
-ऑनलायन सर्विस वरवीं तुमी क्लेम स्टेट्स चेक करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
