लाटंबार्से उद्देगीक वसणुकेचे मालमत्तेंत चलपी चिरेखणींचेर राज्य खण खात्याची धाड
भांगरभूंय | प्रतिनिधी
दिवचल: दिवचल मतदारसंघांतल्या लाटंबार्से पंचायत वाठारांत आशिल्ले लाटंबार्से उद्देगीक वसणुकेचे मालमत्तेंतबेकायदेशीरपणान चलपी चिरेखणींचेर राज्य खण खात्यान धाड घातली. सोमारा दनपरां खण खात्यान अचकीत ह्या वाठारांत धाड घालून लाटंबार्से उद्देगीक वसणुकेचे मालमत्तेंत चलपी चिरेखणींतलीं यंत्रां जप्त केलीं, अशी म्हायती मेळ्ळ्या.
मजगतीं, हे विशीं खण खात्यान दिवचले पुलीस स्टेशनांत कागाळ केल्या. खण खात्याचे अधिकारी ह्या वाठारांत गस्तीचेर गेल्ले कडेन तांकां ही चिरेखणीं बेकायदेशीरपणान चलिल्ल्याचें समजलें. उपरांत अधिकार्यांनी हे खणींचेर धाड घातली.
हे विशीं चड म्हायती प्रमाण, खनीज आनी भुगर्भशास्त्र संचालनालयाचे अधिकारी नितीन आतोसकार आनी श्याम सावंत हे सोमार लाटंबार्से भागात गस्तीचेर गेल्ले. ह्या वेळार तांकां सर्व्हे क्र. ६३३ हे सुवातेर बेकायदेशीरपणान चिरेखणी सुरू आशिल्ल्याचें समजलें. हांगा तांकां तीन खणींचे खड्डे नदरेक पडले. तांतल्या दोन खड्ड्यांनी चिरेखणी आशिल्ल्यो. पावर टिलर आनी हेर यंत्रांचे मजतीन चिरे काडपाचें काम सुरू आशिल्लें. ह्या सर्व्हे क्र. ६३३ च्या एक चौदाचे देंवतेर रकान्यांत लाटंबार्से कोमुनिदाद आनी गोंय उद्देगीक उदरगत महामंडळ हांचीं नांवां आसात.
हे धाडींत ह्या अधिकार्यांनी एका खड्ड्यांतल्यान पावर टिलर, हॉरिझोंटल स्टोन कटिंग मशीन, दोन जनरेटर, टिपर ट्रक जीए ०४ टि ८२९९ जप्त केल्यात. जाल्यार दुसर्या खड्ड्यांतल्यान पावर टिलर, हॉरिझोंटल स्टोन कटिंग मशीन, पत्रो घून धापून दवरिल्लो एक मोटर जप्त केला.
लाटंबार्से कोमुनिदाद तशेंच गोंय उद्देगीक उदरगत म्हामंडळाचे सुवातेर बेकायदेशीर चिरेखणी चलप ही व्हड गजाल. कोणाच्या आशिर्वादान ह्यो खणी चलतात काय? हो एक व्हड प्रस्न सध्या मुखार आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
