भांगरभूंय | प्रतिनिधी
म्हापशें, प्रतिनिधी ः कळंगुट मार्केट वाठारांतले एके इमारतीत जुगार अड्ड्याचेर धाड घालून गुन्यांव फांट्यान कार्ड जुगार उक्ताडार हाडलो. हे कारवायेंत 24 जाणांक अटक केल्या. तांचे कडल्यान 2.40 लाख रोख जाल्यार वट्ट 3 लाख मोलाचो म्हाल जप्त केला.
आयतारा दनपारां 11.30 ते सोमारा दनपारां 3.30 वरां मजगतीं ही धाड घाली. कळंगुट नुस्त्याच्या मार्केट लागसार आशिल्ल्या वेनोर प्लाझा इमारतीच्या दुसऱ्या माळ्यार जुगार चलता अशीं म्हायती गुन्यांव फांट्याक मेळ्ळी. ते प्रमाण पुलीस निरिक्षक किशोर रामाणन, हवालदार स्वप्नील सिमेपुरुषकार हांचे वांगडा राखीव दळाच्या पुलिसांनी उल्लेख केल्ल्या अड्ड्याचेर धाड घाली. ह्या वेळार 20 ते 25 लोक ‘अंदर बाहर’ जुगार खेळटाले.
ह्या दुबावितांक पुलिसांनी ताब्यांत घेतले. ताचे कडल्यान जुगार खेळपाक वापरिल्ले 2 लाख 40 हजार 540 रुपया रोख पयशे जप्त केल्यात. तशेंच वापरिल्लीं कार्डां आनी हेर सामान जप्त केलां. पुलिसांनी गुन्यांव नोंद करून ह्या प्रकरणांत वट्ट 24 जाणांक अटक केल्या. उपरांत सगल्या दुबावितांक जामीनाचेर सोडले.
पुलिसांनी धाड घालतना तांकां भियेवन इमारतीच्या बाल्कनींतल्यान 50 वर्सां पिरायेच्या एकल्यान सकयल उडी मारली. हे घडणुकेंत हो मनीस गंभीर जखमी जाला. ताचेर जीएमसीत उपचार चलतात. पूण हे घडणुकेची अजून कळंगुट पुलीस वा गुन्यांव फांट्यांत नोंद जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
