भांगरभूंय | प्रतिनिधी
वास्को, प्रतिनिधी ः मुरगांव पालिकेन शिटकावणी दिवन लेगीत दामोदर देवळा मुखारच्या मंटपांत परवानो नासतना उबारिल्ले १९ स्टॉल आयज पुलिसांनी काडले. परत अतिक्रमण करून ते उबारल्यार कडक कारवाय करतले, अशी शिटकावणी वास्को पुलिसांनी दिल्या.
देवळा मुखार मंटपांत कांय स्टॉल उबारल्ल्यात अशी कागाळ आयतारा दामोदर भजनी सप्तक महोत्सव समितीन केल्ली. ते कागाळीचेर आदारुन वास्को पुलीस निरिक्षक कपिल नायक आपल्या वांगड्या सयत सांजवेळार ते सुवातेर पावले. पुलिसांनी दिल्ले शिटकावणी उपरांत स्टॉल धारकांनी थंयच्यान स्टॉल काडले. मंटपांच्या सुवातेर कोणेच स्टॉल लावचे न्हय अशी शिटकावणी मुरगांव पालिकेन दिल्ली. पूण तरीय ते स्टॉल्स उबारिल्ले. निमाणें पुलिसांक कारवाय करची पडली.
फाटल्या वर्साय अशे तरेन परवानो नासतना स्टॉल उबारिल्ले. हे विशीं चवकशी केली तेन्ना तांकां कसलोच परवानो नाशिल्ल्याचें दिसून आयलें. देखून तांचे कडल्यान परवानो शुल्क वसूल केलें उपरांत पालिकेचे निरिक्षक आनी कर्मचारी दरेका स्टॉलधारकाचे परवाने तपासपाक लागले तेन्ना जायत्या जाणांनी परवानो नासतना स्टॉल लायिल्ल्याचें कळ्ळें. उपरांत तांचे कडल्यान शुल्क एकठांय केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
