भांगरभूंय | प्रतिनिधी
लखनौ खबरां संस्था ः उत्तर प्रदेशांतल्या बलियांतल्या एका कुटुंबांतल्या 6 जाणांक दोळ्यांचें एक वेगळोच दुयेंस आसा. ह्या कुटुंबांत 8 वांगडी आसात. तातूंतल्या चार जाणांक फकत दिसांचे दिसना. रातच्या वेळार दिसता. जाल्यार दोगांक रातच्या वेळार दिसना. दिसांचे दिसता. दोतोरां कडेन वचून लेगीत हें दुयेंस बरें जावंक ना. सध्या ह्या आगळ्या वेगळ्या दुयेंसाची चर्चा सगळी कडेन चालू आसा.
हें कुटुंब बलियाच्या हनुमान गंज ब्लॉकांतल्या बांसडीह रोड टकरसन ह्या गांवांत रावता. ह्या कुटुंबाच्या मुखेल्याचें नांव रामप्रवेश पासी. रामप्रवेशाक वट्ट स भुरगीं आसात. तातूंत हरी पासी, रामू, भानू, जयराम हांकां दिसांचे दिसना. रातचे दिसता. जाल्यार पूत सुनील आनी राज चहेलिया हांकां रातच्या वेळार दिसना. दिसाचें दिसता. रामप्रवेशाची घरकान्न सुनीता देवी हांकांय हें दुयेंस आसा. सुनीता देवी दिव्यांग आसात.
हें सामकें गरीब कुटुंब. तांची अर्थीक स्थिती वायट आसा. तांकां रावपाक सारकें घर ना. मातयेच्या घरांत रावता. तांकां रेशन कार्ड लेगीत ना. देखून तांकां उज्ज्वला येवजणे सयत खंयचेच सरकारी येवजणेचो लाव घेवंक मेळना.
दोतोर म्हणटा….
ह्या दोळ्यांच्या दुयेंसाक नायक्टालोपिया अशें म्हण्टात. ताचो अर्थ रातचें कुड्डेंपण (रातांधळेपणा) असो आसा. ह्या दुयेंसात रातचें दिसपाक त्रास जावं येता. हो दुयेंस आशिल्ल्या लोकांक रातच्या वेळार उजवाडाच्या उजवाडांत स्पश्टपणान दिसना. जाल्यार ज्या लोकांक दिसांचें दिसना तांच्या ग्लुकोमा वा ऑप्टिक नर्व्ह हांतूत समस्या आसूं येता अशें दोळ्यांचो दोतोर सांगता. मजगतीं, एकाच कुटुंबांतल्या वांगड्यांक हो दुयेंस कित्याक जाला? हाचेर कांयच सांगूंक शकना. अशा आनुवंशिक दुयेंसाक ऑटो इम्युन दुयेंस अशें म्हण्टात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
