भांगरभूंय | प्रतिनिधी
केंद्रीय गिरायक मंत्रालयाचे आदेश
नवी दिल्ली, खबरां संस्था ः देशांत उण्या दर्ज्याचें हेल्मेट तयार करून विकपी लोकांचेर आतां कसलीच दया दाखोवचे ना. केंद्रीय गिरायक मंत्रालयान सगल्या 736 जिल्लोधिकारी दंडाधिकाऱ्यांक अशा लोकांचेर कारवाय करपाचो आदेश दिला. तेच बरोबर हेल्मेटाच्या दर्ज्याचेर नियंत्रण दवरपा खातीर आदेश दिला. जिल्लोधिकाऱ्यांन स्वता चवकशी करुन आयएसआय मार्क नाशिल्ले आनी उण्या दर्ज्याचें हेल्मेट तयार करतात ते कारखाने सील करपाचे आदेश दिल्यात.
मंत्रालयाचे अतिरिक्त सचीव भरत खेडा हांणी हो आदेश जारी केलां. उण्या दर्ज्याचें हेल्मेट तयार करपी आनी विकपी लोकांचेर कारवाय करपाचो कायदो आसून लेगीत अशे हेल्मेट तयार करून विकपाक लागल्यात. सगल्या अधिकाऱ्यांनी हें काम वैयक्तीक पांवड्यार घेवचें. ही कारवाय रस्तो सुरक्षा मोहिमेचो एक भाग आसा.
हेल्मेट आयएसआय मार्क आनी डीओटी मार्क आशिल्ले आसूंक जाय. आयएसआय हें भारतीय हेल्मेटाचें मानक चिन्न. जाल्यार डीओटी अमेरिकन मानक आसा.
आयएसआय आनी डीओटी मार्क आशिल्ले हेल्मेट चड म्हारग नात. हें हेल्मेट तुमी 1500 रुपया वा 2000 रुपया सुरवातीच्या दरान विकतें घेवंक शकतात. तुमकां बरे हेल्मेट जाय जाल्यार स्टीलबर्ड सारकिल्या कंपनीच्या हेल्मेटाक वचचें. जे अपघातात तुमची राखण करुंक शकता. जितले घटमूट आनी उच्च दर्ज्याचें हेल्मेट तुमी वापरतले तितलें तें फायद्याचे थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
