भांगरभूंय | प्रतिनिधी
दिव्यांगां खातीर गोंयांत सुरू जातल्यो ई-रिक्षा
पणजी: गोंयचे अर्थीक उदरगतींत दिव्यांग नागरिकांची भागिदारी वाडची आनी तांचेंय अर्थीक सक्षमीकरण सुनिश्चीत करपाक राज्य दिव्यांगजन आयुक्त कार्यालय आनी गोंय मायल्स हांणी हालींच समजिकायेचे कबलातीचेर सय केली. ‘सर्वसमावेशक गोवा’ उपक्रमा खाला पर्पल ई-रिक्षा सुरू केली. गोवा मायल्सच्या पोर्टला वरवीं ही सुविधा चलयतले.
राज्य दिव्यांगजन आयुक्त कार्यालय आनी गोवा मायल्स हांचे मदली ही समजिकायेची कबलात राज्यांतल्या दिव्यांग व्यक्तींच्या सक्षमीकरणाचे नदरेन एक म्हत्वाचें पावल आसा.
ह्या वेळार दिव्यांगजन सक्षमीकरण मंत्री सुभाष फळदेसाय, दिव्यांगजन सक्षमीकरण सचीव ई. वल्लावन (आयएएस), दिव्यांगजन आयुक्त गुरुप्रसाद पावसकार, सचीव ताहा हाजिक, गोवा मायल्सचे वेवस्थापकीय संचालक उत्कर्ष सुधीर दाभाडे आनी हेर अधिकारी हाजीर आशिल्ले.
श्री. फळदेसाय हांणी सांगलें, हे कबलातीक लागून दिव्यांग व्यक्तींक पोट चलोवपाचें साधन मेळोवप शक्य जातलें. तशेंच हेरांचेर निंबून रावनासतना भोंवपाचेंय स्वातंत्र्य मेळटलें. जंय दरेक व्यक्ती मानान जगपाक शकतली, अशें वातावरण निर्माण करपाक खातीर आमी तयार आसात.
श्री. पावसकार हांणी सांगलें, दिव्यांग व्यक्तीचे सदचे जिणेंत आनीक मेकळीक आनी सर्वसमावेशकताय सुनिश्चीत करून तांची जीण समृद्ध करपाक आमी तयार आसात. हे दिकेन ही कबलात हें म्हत्वाचें पावल थारतलें. आतां दिव्यांग व्यक्तींक प्रवासाचे पर्याय उपलब्ध जावपाचे आशिल्ल्यान उपरांत ते मानान प्रवास करपाक शकतले. ह्या उपक्रमा खातीर राज्य दिव्यांगजन आयुक्त कार्यालय प्रवासा खातीर ई-रिक्षा उपलब्ध करतलें. ई-रिक्षा चलोवपा खातीर चालकांक सज्ज करपा खातीर गोवा मायल्सा वतीन प्रशिक्षण कार्यावळ आयोजीत करतले. तशेंच दिव्यांग आनी तांच्या कुटुंबाक सक्षम करपा खातीर गोवा मायल्स वरवीं वेवसायूय विकसीत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
