भांगरभूंय | प्रतिनिधी
नवी दिल्ली, खबरां संस्था ः रीण मेळोवपा खातीर सिबिल स्कोअर आसप खूब म्हत्वाचें. सिबिल स्कोअर बरो आल्यार सोंपेपणान रीण मेळटा. आतां भारतीय रिझर्व्ह बँकेन नेमांत बदल केल्यात. नव्या नेमा प्रमाण गिरायकाचो सिबिल स्कोअर दर 15 दिसां उपरांत अपडेट जातलो. देखून गिरायकांक आपलो सिबिल स्कोअर बरो दवरचो पडटलो. हो नवो नेम 1 जानेवारी 2025 सावन लागू जातलो. रिझर्व्ह बँकेचे गव्हर्नर शक्तिकांत दास हांणी हे विशीं म्हायती दिल्या.
तुमचो सिबील स्कोर वायट आसल्यार फुडले खेपे रीण मेळोवपा खातीर समस्या निर्माण जाव येता. जे रीण वेळार फारीक करिनात तांकां ही समस्या जातली. गिरायकाचो सिबील स्कोर दर 15 दिसां उपरांत अपडेट जातलो. देखून अर्थीक संस्थांनी बेगीनांत बेगीन सिबील स्कोर अपडेट करचो अशें आरबीआयन सांगलां.
बँकेक आनी गिरायकाक दोगांकय फायदो
मेळिल्ले म्हायती प्रमाण सिबील स्कोर दर म्हयन्याच्या 15 तारखेक आनी म्हयन्याच्या निमाणे अपडेट करूं येता. क्रेडिट संस्था आनी क्रेडिट इन्फॉर्मेशन कंपनीं आपल्याक जाय तशी तारखां थारावंक शकतात. ज्या खाला डेटा अपडेट करूं येता. क्रेडिट संस्थांनी दर म्हयन्याक गिरायकांची क्रेडिट म्हायती सीआयसीकडेन सादर करप गरजेचें. हाचो फायदो बँक आनी गिरायक दोगांयचोय जातलो. बँक आनी एनबीएफसी हांचे खातीरय क्रेडिट म्हायती खूब म्हत्वाची. हाका लागून कोणाक रीण दिवचें आनी कोणाक दिवचें ना हो निर्णय घेवंक मेळटा. हाका लागून रिणाचेर घेवपी व्याजदर थारावपाकय मजत जातली. बरो क्रेडीट स्कोअर आशिल्ल्या गिरायकांक उण्या दरांत रीण मेळूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
