भांगरभूंय | प्रतिनिधी
जहानाबाद, खबरां संस्था: बिहारच्या जहानाबादच्या बाबा सिद्धनाथ मंदिरांत आयतारा बरीच गर्दी जाल्ली. ताका लागून देवळांत खेटाखेट जावन सात भाविकांक मरण आयलें. मरण आयिल्ल्यां मदीं तिगा बायलांचोय आसपाव आसा. तशेंच हे घडणुकेंत ३५ परस चड भावीक जखमी जाले. जखमींचेर सध्या उपचार सुरू आसात. हे घडणुकेची म्हायती मेळटांच पुलीस रातचेच घडणुके सुवातेर दाखल जाले. तांणी हे घडणुकेचें कारण सोदपाचे नदरेन तपास सुरू केला.
जहानाबादच्या पुलीस निरीक्षकांनी सांगलें, ३५ भावीक जखमी जाल्यात. मजगतीं हे खेटाखेटींत मरण आयिल्ले एके बायलेच्या कुटुंबियांनी हे घडणुकेक प्रशासनाक जापसालदार थारायलां. तांणी सांगलां, देवळांत गर्देचें नियोजन करूंक ना. तशेंच हांगा सुरक्षिततायेची वेवस्था नाशिल्ली.
कांय लोकांनी पुलीस निरीक्षकांक सांगलें, प्रशासनान एनसीसींतल्या तरणाट्यांक हांगचे सुरक्षा आनी हेर वेवस्था पळोवपाक तैनात केल्यात. तांणी भाविकांचेर दांड्यान हल्लो केलो. ताका लागून भावीक धांवपळ करपाक लागले. उपरांत बरोच बोवाळ जालो आनी ही खेटाखेटीची घडणूक घडली. ह्या सगळ्याक प्रशासनाचीच चूक आसा.
घडणुकेचें कारण कितें?
एकल्यान सांगलें, देवळा भायर फुलां विकपी फेरीवाल्याचें झगडें सुरू आशिल्लें. तेन्ना दांड्यान हल्लो जालो. ताका लागून लोक हांगा-थंय धांवपाक लागले आनी उपरांत ही खेटाखेट जाली. हातूंत ५० ते ६० जाण जखमी जाल्यात आसूंक जाय. ६ ते ७ जाणांच्यो कुडी हॉस्पिटलांत व्हेल्ल्याच्यो हांवें पळयल्या. ही घडणूक घडटना हांगा पुलीस नाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
