भांगरभूंय | प्रतिनिधी
ज्येष्ठ अभिनेते विजय दत्ताराम कदम शेनवारा संवसाराक अंतरले. मराठी सिनेमा, टीव्ही माळो, नाटकांनी तांणी साबार तरांच्यो, खास करून विनोदी भूमिका रंगयल्यात. ‘रथचक्र’, ‘टुरटूर’ सारक्या साबार नाटकांनी अभिनयाची छाप सोडपी विजय कदमान 1980 च्या दशकांत कारकिर्दीक सुरुवात केल्ली.
शरद तळवलकर, राजा गोसावीं सारके ज्येश्ट विनोदी नट तागेले आदर्श. विजय कदमान भुरगेपणांत ‘राजा भिकारी माझी टोपी चोरली’ ह्या बाल नाटकांत हवालदाराची भूमिका करून रंगमाचयेर पावल दवरलें. उपरांत दरवर्सा आंतरशालेय सर्तींत भाग घेतलो. तागेली जडणघडण जाली ती डॉ. शिरोडकर हायस्कूलांत. तांचें महाविद्यालयीन शिक्षण मुंबयच्या रूपारेल महाविद्यालयांत जालें. ‘तत्वज्ञान’ हो गंभीर विशय घेवन ताणें पदवी घेतली.
महाविद्यालयाच्या रुप्या उत्सवी वर्सा ताका पयलो विद्यार्थी दिग्दर्शक म्हणून वेंचून काडिल्लो. तेन्ना जेश्ट हिंदी अभिनेते डेव्हीड हांचे हस्तुकीं तागेलो भोवमान जाल्लो. विजय कदमाचे ‘अपराध कुणाचा’ हे पयलें वेवसायिक नाटक. फुडें ‘स्वप्न गाणे संपले’त सतीश दुभाषी, जयराम हर्डीकर, शिवाजी साटम अशा कलाकारा वांगडा काम करूंक मेळ्ळें. ‘खंडोबाचं लगीन’ ह्या नाटका खातीर विजयाक नाट्य दर्पणाचो ‘सर्वोत्कृष्ट लोकनाटय अभिनेता’ हो पुरस्कार फावो जालो. वेवसायिक नाटकां करतना ताच्या टूरटूर या नाटकाक जबरदस्त लोकप्रियता मेळी. विच्छा माझी पुरी करा हें लोकनाट्यूय खूब गाजलें. ताणें ह्या लोकनाट्याचें 1986 सावन 750 परस चड प्रयोग केले.
तागेल्या ‘विजयश्री’ संस्थे वरवीं ‘खुमखुमी’ ही ताचे संकल्पनेंतल्यान साकारिल्ली अडीच वरांची मनरिजवणेची कार्यावळ तो सादर करतालो. ताच्या उत्पन्नांत्यान ताणें खूब समाजिक संस्थांक आनी गरजू दिव्यांगांक मजत केल्ली. राजानं वाजवला बाजा, इरसाल कार्टी, गोळाबेरीज, वासुदेव बळवंत फडके, देखणी बायको नाम्याची, कोकणस्थ हे तागेले चित्रपट. विजय कदमान ‘हळद रुसली कुंकू हसलं’ चित्रपटांत अश्विनी भावेल्या घोवाची भूमिका साकारल्या. सही रे सही, टुरटूर, पप्पा सांगा कुणाचे, विछ्या माझी पुरी करा, खुमखुमी ही नाटकां लेगीत बरीच गाजलीं. ताणें पार्टनर, गोट्या, दामिनी, सोंगाडया बाज्या, इंद्रधनुष्य, घडलयं बिघडलयं, ती परत आलीय अश्या टीव्ही माळांनी आनी श्रीमान श्रीमती, मिसेस माधुरी दीक्षित, अफलातून, घर एक मंदिर या हिंदी माळांनीय अभिनय केला. जायरातीय केल्यात.
पल्लवी जोशी आनी मास्टर अलंकार हांगेली व्हडली भयण पद्मश्री ही विजयाली बायल. पूत गंधार कदम हो गायक. ताणें पोश्टर बॉईज चित्रपटातलीं गाणी गायल्यांत. विजय आनी पद्मश्री हांगेली ‘विजयश्री नाट्यसंस्था’ महाराष्ट्र, तशेंच परदेसांतूय नाटकां करताली. दोन वर्सा पयलीं विजय कदम हाणें 1 मे दिसा युट्यूबाचेर ‘कदमखोल’ ही नवी माळ सुरू केल्ली. ताणें ‘हलकं फुलकं’ हें पुस्तक बरयलां. फाटलें देड वर्स तो कॅन्सराचेर उपचार घेतालो. ताचे कडेन झुजतना ताका मरण आयलें.
———————=
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
