भांगरभूंय | प्रतिनिधी
खाशेले ग्रामसभेंत थाराव संमत
भांगरभूंय | प्रतिनिधी
मडगांवः दक्षीण गोंयच्या वेर्णा वाठारांत सनबर्न महोत्सवाच्या आयोजना खातीर अधिकारी पळोवणी करपाक आयिल्ले. तेन्ना तांकां थळाव्यांनी जाप विचारिल्लो. हेच फाटभुंयेर खासा ग्रामसभेचें आयोजन केलें. ह्या वेळार सनबर्न महोत्सवाक लोटले वाठारांत विरोध आशिल्ल्याचो थाराव संमत केलो. तशेंच कोयर प्रक्रिया प्रकल्पाकूय न्हयकार दिलो. तशेंच रोमी कोंकणीक अधिकृत भाशेचो दर्जो दिवपाची खातीर मागणी केली. सनबर्न महोत्सवाच्या विशयाचेर लोटलेच्या लोकांनी चर्चा करपा खातीर खासा ग्रामसभेची मागणी केल्ली. ते प्रमाण आयतारा पंचायतीच्या सभाघरांत जाल्ले ग्रामसभेंत सनबर्न महोत्सवाक लोकांनी खर विरोध केलो. सनबर्न महोत्सवाक दक्षीण गोंयच्या विंगड विंगड वाठारांतल्यान विरोध जातालो. तेन्ना किटल वाठारांतले सुवातेक आयडीसी कडल्यान न्हयकार मेळ्ळे उपरांत वेर्णा पठाराचेर पळोवणी करताले. पळोवणी करतना आयडीसीच्या अधिकार्यां सयत बूक माय शोच्या कर्मचार्यांनकडेन लोटलेच्या लोकांनी वासपूस केली, तेन्ना तांकां विचारिल्ल्या प्रस्नांची जाप दिवपाक जाली ना. ताका लागून हे विशीं ग्रामसभेंत चर्चा करून लोकांनी गांवांतले खंयचेच सुवातेर सनबर्न महोत्सवाक परवानगी दिवची न्हय, लोकांचो ताका विरोध आसतलो असो थाराव संमत केलो. सनबर्नाक विरोध करपा खातीर ग्रामसभा जावपी हॉलाच्या भायरूय गोंयची संस्कृताय वाटयात, ड्रग्ज संस्कृती गोंयांत नाका, सनबर्न गोंयांत नाका अशे तरेचे तकटे प्रवेशदाराचेर लायिल्ले.
कोयर प्रक्रिया प्रकल्पाक विरोध
लोटले ग्रामसभेंत वेर्णाच्या पठाराचेर जावपी कोयर प्रक्रिया प्रकल्पाकूय विरोध जालो. वेर्णा उद्देगीक वसणुकेंत जावपी प्रदुशणाक लागून पयलींच लोटले सयत आशिकुशीकच्या गांवच्या लोकांक त्रास जातात. हातूंतच आतां आनीक कोयर प्रक्रिया प्रकल्प उबारल्यार कोयराचो प्रस्न सुट्टलो, अशेंय सांगलें. साश्टींतले 32 गांव, कुंकळे, मडगांव आनी मुरगांव पालिकेंतल्या कोयराचेर प्रक्रिया करपाक वेर्णा प्रक्रिया प्रकल्प येवपाचो आशिल्लो. ताका दोन वर्सां आदींय विरोध केल्लो. आतां होच प्रकल्प परत येवपाचो आसा अशी सुलूस लागताच लोकांनी परतून विरोधांत थाराव घेतला.
रोमी कोंकणीक फाटीं पडपाक दीवं नाकात
गोंयांत देवनागरी कोंकणीक राजभाशेचो दर्जो मेळ्ळा. रोमी कोंकणी फाटीं पडल्या. तियात्र, मांडे आनी हेर साहित्य रोमी लिपींतल्यान बरयतात. ताका लागून रोमी कोंकणी लिपीकूय अधिकृत भाशेचो दर्जो मेळचो, असो थाराव ग्रामसभेंत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
