भांगरभूंय | प्रतिनिधी
भांगरभूंय । प्रतिनिधी
पेडणें: आयतारा फांतोडेर 5 वरांच्या सुमाराक शॉर्ट सर्किट जाल्ल्यान मांद्रेंच्या यश शुटींग अकादमीच्या यश शुटींग हबाक उजो लागलो. ह्या उज्यांत सुमार 30 ते 40 लाख रुपयांचें लुकसाण जाल्ल्याची म्हायती यश शुटींग अकादमीचे धनी योगेश्वर शिवा पाडलोस्कार हांणी दिली.
हे अकादमींत 18 ते 28 ऑगस्ट ह्या काळांत उक्त्या गटांतली राष्ट्रीय शुटींग सर्त आयोजीत केल्ली ती थारिल्ल्या वेळारूच जातली. हे सर्तींत सुमार 5 हजार खेळगडे वांटो घेतले. ते खातीर आतांच्यानूय गोंयांतल्या चड करून मांद्रेंच्या हॉटेलांनी व्हड प्रमाणार बुकींग जालां, अशेंय पाडलोस्कार हांणी सांगलें.
ह्या उज्यांत यश शुटींग अकादमीचो सर्वर रूम तशेंच आपले मुख्य कुडींत दवरिल्ली रायफल शुटींगच्यो विवीध रेंजीच्यो बंदुको, पिस्तुलां, ताका लागपी काडतुसां, गुळयो, तशेंच टीव्ही, फ्रीज, वॉशींग मशीन, लॅपटॉप हे सारकिल्ल्यो वस्तू उज्याचे भकीक पडल्यो. तातूंत 10 वरस अदीक बंदुको आशिल्ल्यो. दरेका बंदुकीचें मोल 3 ते 10 रुपया मेरेन आशिल्ल्याचें पाडलोस्कार हांणी सांगलें.
पालोस्कार हांणी सांगलें, आपूण आपल्या करासवाडो म्हापशेंच्या घरा न्हिदिल्लो. फांतोडेर यश शुटींग अकादमींतल्या सुरक्षारक्षकांनी आपल्याक आयतारा फातोडेर 5 वरांच्या सुमाराक फोन केलो आनी उजो लागिल्ल्याची म्हायती दिली. आमी रोखडोच उजो पालोवपी दळा कडेन संपर्क करपाचो यत्न केलो, पूण संपर्क जावंक ना. सोमत्या सोमती आमी घडणूक थळाचेर धांव घेतली. हे मजगतीं उजो पालोवपी दळा कडेन आमचो संपर्क जालो. आमी पावले उपरांत रोखडीच उजो पालोवपी दळाची गाडी पावली खरी, पूण ते मेरेन सगळें लासून गोबर जाल्लो. ते उपरांत जवानांनी उरिल्लो उजो पालयलो, पूण ते मेरेन आमचें लाखांनी रुपयांचें लुकसाण जाल्लें.
हे विशीं यश शुटींग अकादमीची मुखेली तशेंच प्रशिक्षक भाग्यश्री पाडलोस्कार हांणी सांगलें, उज्यांत यश शुटींग अकादमीचें लाखांनी रुपयांचें लुकसाण जालां खरें, पूण जंय रायफल वा हेर शुटींग सर्ती घेतात ती शुटींग रेंज सुरक्षीत आसा. ताका लागून 18 ते 28 ऑगस्ट ह्या काळांत गोंयांत पयलेच खेपे जावपी उक्त्या गटांतल्यो शुटींग सर्ती थारिल्ल्या वेळारूच जातल्यो, असो विस्वास आसा. हे सर्तीं खातीर 4500 परस अदीक खेळगड्यांनी नांवनोंदणी केल्या. दरेका खेळगड्या वांगडा एक- दोग जाण धरले जाल्यार 10 ते 15 हजार प्रेक्षक हे सर्ती खातीर गोंयांत येतले, अशें तांणी सांगलें.
गोंयांत जाल्ले राष्ट्रीय खेळां सर्तींतल्यो रायफल शुटींग सर्ती हेच सुवातेर घेतिल्ल्यो. आतां परतून एकदां थंय राष्ट्रीय शुटींग सर्ती घेवपाक आमी तयार रावल्यात. ह्या उज्याचे दुर्घटणेचो सर्तींचेर मातूय परिणाम जावचो ना. ताका लागून नांवनोंदणी केल्ल्या खेळगड्यांनी हुस्क्या मेकळे रावचे, अशें भाग्यश्री पाडलोस्कार हांणी सांगलें. मजगतीं, मांद्रें पुलीस स्टेशनाचे उपनिरिक्षक परेश काळे हांच्या मार्गदर्शना खाला पुलीस कॉन्स्टेबल सतीश शेट्ये हांणी हे दुर्घटणेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
