भांगरभूंय | प्रतिनिधी
पणजी : उटंगाराचो पावस आनी वादळी वाऱ्याक लागून गोंयांत 741 हॅक्टर शेत जमनीचें लुकसाण जाल्ल्याचें निश्चीत जालां. तशेंच लुकसाण भरपाये खातीर आतां मेरेन 2,653 अर्ज खात्या कडेन आयल्यात. अर्ज येवप चालूच आशिल्ल्यान शेतांचे लुकसाणीचें प्रमाण वाडटलें, अशी म्हायती गोपांनी दिली.
गोंयांत अंदूं सुमारा भायर उटंगाराचो पावस पडला. उटंगाराच्या पावसाक लागून शेतांत उदक भरून उरलां. कांय शेतांतलें उदक व्हांवून गेलां जाल्यार कांय शेतांनी उदक भरिल्लें आसा. विभागीय शेतकी अधिकाऱ्यां वरवीं लुकसाणेची मोलावणी चालू आसा. अर्ज आयले उपरांत शेतकी अधिकारी वाठाराक भेट दिवन पळोवणी करतात, अशी म्हायती शेतकी संचालक संदीप फळदेसाय हांणी दिली.
लुकसाण भरपाये खातीर 2,206 अर्ज कृशी कार्डा सयत आयल्यात. 447 अर्ज कृशी कार्डा बगर आसात. कृशी कार्ड आशिल्ल्या शेतकारांचो लुकसाणीचो वाठार 648 हॅक्टर जाता. कृशी कार्ड नाशिल्ल्या शेतकारांचो लुकसाणीचो वाठार 92 हॅक्टर जाता. दोनूय मेळून 741 हॅक्टर शेतांची लुकसाण जाल्ल्याचें स्पश्ट जाता. साश्ट म्हालांतल्या सखल वाठारांत उदक भरून उरलां. हाका लागून मोलावणी करप शक्य ना, अशी म्हायती गोपांनी दिली.
पावसाक लागून सगल्या म्हालांनी शेतांचें लुकसाण जालां. शेतांचे तुळेंत बागायतीच्या लुकसाणीचें प्रमाण उणें आसा. फोंडें आनी सत्तरी म्हालांत बागायतींचें चड लुकसाण जालां, अशी म्हायती अधिकाऱ्यांनी दिली.
ज्या शेतकारां कडेन कृशी कार्ड आसा, तांकां शेतकरी आदारभूत निधी खाला लुकसाण भरपाय मेळटली. ज्या शेतकारां कडेन कृशी कार्ड ना, तांकां मुख्यमंत्री सहाय्यता निधींतल्यान लुकसाण भरपाय मेळटली. जांचे कडेन कृशी कार्ड ना, तांकां लुकसाणेचो फोटो सादर करप गरजेचें आसा. ह्या फोटवांत शेतकार दिसपाची अट आसा. शेतकारां कडल्यान अर्ज आयले उपरांत विभागीय अधिकारी लुकसाणेची पळोवणी करतात. अधिकारी थारायता ते प्रमाण लुकसाण भरपाय मेळटली. जांचे कडेन कृशी कार्ड ना, तांकां लेगीत लुकसाण भरपाय दिवपाचे आदेश सरकारान दिल्या. दरेका शेतकाराक 5 हजार रूपयां वयर लुकसाण भरपाय मेळटली.
मॉन्सून येतकच गोंयांत पावसाक सुरवात जाली. जूनांत अदीं मदीं चड पावस पडटालो. मात उपरांत नेट उणो जातालो आनी शेतांतले उदक व्हांवून वतालें. जुलयांत मात पावसाचें स्वरूप बदल्ले. विसव घे नासताना आठ, आठ दीस पावस पडपाक लागलो. हाका लागून सखल वाठारांत उदक सांठोवन रावपाक लागलें. उदक चार दिसां वयर सांठोवन उरलें जाल्यार रोपांचीं मुळां कुसतात.
शेतां उदका पोंदां आशिल्ल्यान मोलावणेक कळाव
सेगीत पडिल्ल्या पावसाक लागून साश्ट, तिसवाडी, पेडणें म्हालांतल्या सखल वाठारांत उदक सांठोवन उरलें. रोप उदका पोंदां खूब दीस उरले आनी कुसली. अशे तरेन भात शेताचें लुकसाण जालें. शेतांचे लुकसाणीची मोलावणी करपाचे आदेश मुख्यमंत्र्यांनी दिले उपरांत शेतकी अधिकाऱ्यांनी शेती वाठाराची पळोवणी केली. उदक भरिल्ल्यान खंय भात रोयलां हें कळप लेगीत कुस्तार जालें. हाका लागून लुकसाणेच्या मोलावणीक कळाव जालो.
कृशी कार्ड नाशिल्ल्यांकूय मेळटली भरपाय
शेतांचे लुकसाणीचेर विधानसभेंत लेगीत चर्चा जाली. फर्मागुडी तशेंच दोंगराळ वाठारांत मळ्याची लागवड करपी शेतकारां कडेन कृशी कार्ड नासता. कागदपत्रां नासतात. तवशीं, घोसाळीं, भेंडे, चिबडां हांची ते लागवड करतात. ह्या शेतकारांक लुकसाण भरपाय दिवपाची मागणी विधानसभेत जाली. कृशी कार्ड नाशिल्ल्या शेतकारांक मुख्यमंत्री सहाय्यता निधींतल्यान लुकसाण भरपाय दिवपाचे सरकारान जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
