भांगरभूंय | प्रतिनिधी
म्हापशें, प्रतिनिधी ः म्हापशेंच्या स्थानबध्दता केंद्रांतल्यान तीन बांगलादेशी नागरिकांनी पळ काडलो. केंद्राच्या पांख्यावेले शिमिटाचे पत्रे काडून आनी राखणे वणटी वेल्यान उडी मारून ह्या तिगूय दुबावीत पळून गेले. हे विशीं म्हापशें पुलिसांनी त्या तिगांय आड गुन्यांव नोंद केला. मोहम्मद नयन हवालदेर (१९), मोहम्मद हिलाल (३५) आनी मोहम्मद तोहेत मरिदा (२५) अशीं ह्या दुबावितांचीं नांवां जावन आसात.
चड म्हायती प्रमाण, ही घडणूक आयतारा फांतडच्या ५ वरांचेर उक्ताडार आयली. स्थानबध्दता केंद्रांतल्या कर्मचार्यान तिगूय बांगलादेशी आरोपी तांचे सुवातेर नाशिल्ल्याचें समजलें. कर्मचार्यांनी भितर वचून पळयल्यार ते कुडीचें पांखें उक्तें आशिल्लें. रोखडीच तांणी ही म्हायती अधिकार्यांक दिली. ह्या केंद्रा भोंवतणच्या वाठारांत तांचो सोद घेतलो. मात ते सापडूंक ना.
उपरांत म्हापशें पुलिसांक हे विशीं म्हायती दिली. निरीक्षक सुदेश वेळीप हांचे कागाळीच्या आदारार म्हापशें पुलिसांनी विदेशी कायदो कलम १४ खाला दुबाविता आड गुन्यांव नोंद केला. फुडलो तपास पुलीस करतात.
ह्या तिगाय दुबावितांनी फांतोडेर ३ ते ५ वरां मजगतीं डिटेंशन सेंटरांतल्यान पळ काडपाची येवजण आखल्या आसतली असो अदमास केंद्राच्या अधिकार्यांनी उक्तायलो.
मजगतीं, फाटल्या २४ डिसेंबर २०२३ सावन हे तिगूय बांगलादेशी नागरीक ह्या केंद्रांत आशिल्ले. पेडणें पुलिसांनी एका चोरयेच्या प्रकरणांत त्या तिगांकूय अटक केल्ली. उपरांत न्यायालयांनी तांकां दोशी थारावन स म्हयन्यांची ख्यास्त दिल्ली. कोलवाळेचे बंदखणींत ख्यास्त पुराय केले उपरांत तांकां म्हापशेंच्या नजरबंदी केंद्रांत दाखल केल्ले. संबंदीतां कडेन कसलेच तरेचीं कागदपत्रां नाशिल्ल्यान तांकां आजूनय डिपोर्ट करूंक नाशिल्लें. हे विशीं गृहखात्यान बांगलादेश प्रशासना कडेन संपर्क केल्लो. मात तांचे कडल्यान आजूनय कसलेच तरेचें पत्र येवंक नाशिल्लें.
ह्या तिगाय स्थानबध्द केल्ल्या आरोपींनी नजरबंदी केंद्रांतल्यान पळ काडले उपरांत परत ह्या केंद्राचे सुरक्षिततायेचो प्रस्न मुखार आयला. आतां मेरेन ह्या केंद्रांतल्यान वट्ट ५ विदेशी नागरिकांनी पळ काडला. हाचे पयलीं ३१ जानेवारी २०२० दिसा अमीनू कानू महम्मेद हो नायजेरीयन नागरीक पळून गेल्लो. २ मार्च २०२३ दिसा डिमीट्री आलेक्झांड्रोव्ह हो रशियन नागरीक पळून गेल्लो. केंद्राचे कुडीक लायिल्लें लोखणाचें कुलूप तोडून आनी नळ्यांच्या पांख्यांची लोखणाची रीप कापून हे दुबावीत पळून गेल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
