भांगरभूंय | प्रतिनिधी
मडगांव, प्रतिनिधी : दक्षीण गोंयच्या वेर्णा वाठारांत सनबर्न आयोजना खातीर अधिकारी पळोवणी करपा खातीर आयिल्ले. तेन्ना तांकां थळाव्यांनी जाप विचारिल्ली. हेच फाटभूंयेर खासा ग्रामसभेचें आयोजन केलें. ह्या वेळार सनबर्न फेस्टिवलाक लोटले वाठारांत विरोध आशिल्ल्याचो थाराव संमत केलो. तशेंच कोयर प्रक्रिया प्रकल्पाकूय न्हयकार दिलो. तशेंच रोमी कोंकणीक अधिकृत भाशेचो दर्जो दिवपाची खातीर मागणी केली.
सनबर्न फेस्टिवलच्या विशयाचेर लोटलेच्या नागरिकांनी चर्चा करपा खातीर खासा ग्रामसभेची मागणी केल्ली. ते प्रमाण आयतारा पंचायतीच्या सभाघरांत जाल्ले ग्रामसभेंत सनबर्न फेस्टिवलाक नागरिकांनी खर विरोध केलो. सनबर्न फेस्टिवलाक दक्षीण गोंयच्या विंगड विंगड वाठारांतल्यान विरोध जातालो. तेन्ना किटल हांगचे सुवातेक आयडीसी कडल्यान न्हयकार मेळ्ळ्या उपरांत वेर्णा पठाराचेर पळोवणी करताले. पळोवणी करतना आयडीसीच्या अधिकार्यां सयत बुक माय शोच्या कर्मचार्यांकडेन लोटयेच्या नागरिकांनी वासपूस केली तेन्ना तांकां विचारिल्ल्या प्रस्नांची जाप दिवपाक जाली ना. ताका लागून हे विशीं ग्रामसभेंत चर्चा करुन नागरिकांनी गांवांतले खंयचेच सुवातेर सनबर्न फेस्टिवलाक परवानगी दिवची न्हय, नागरिकांचो ताका विरोध आसतलो असो थाराव संमत केलो. सनबर्नाक विरोध करपा खातीर ग्रामसभा जावपी हॉलाच्या भायरूय गोंयची संस्कृताय वाटयात, ड्रग्ज संस्कृती गोंयांत नाका, सनबर्न गोंयांत नाका अशे तरेचे तखटे प्रवेशदाराचेर लायिल्ले.
कोयर प्रक्रिया प्रकल्पाक विरोध
लोटले ग्रामसभेंत वेर्णाच्या पठाराचेर जावपी कोयर प्रक्रिया प्रकल्पाकूय विरोध जालो. वेर्णा उद्देगीक वसणुकेंत जावपी प्रदुशणाक लागून पयलींच लोटले सयत आशिकुशीकच्या गांवच्या लोकांक त्रास जातात. हातूंतच आतां आनीक कोयर प्रक्रिया प्रकल्प उबारल्यार कोयराचो प्रस्न सुट्टलो, अशेंय सांगलें. साश्टींतले ३२ गांव, कुंकळे, मडगांव आनी मुरगांव पालिकेंतल्या कोयराचेर प्रक्रिया करपाक वेर्णा प्रक्रिया प्रकल्प येवपाचो आशिल्लो. ताका दोन वर्सां आदींय विरोध केल्लो. आतां होच प्रकल्प परत येवपाचें समजतांच नागरिकांनी परत विरोधांत थाराव घेतला.
रोमी कोंकणीक फाटीं पडपाक दिव नाका
राज्यांत देवनागरी कोंकणीक राजभाशेचो दर्जो मेळ्ळा. रोमी कोंकणी फाटीं पडल्या. तियात्र, मांडे आनी हेर साहित्य रोमी लिपींतल्यान बरयतात. ताका लागून रोमी कोंकणी लिपीकूय अधिकृत भाशेचो दर्जो मेळचो, असो थाराव ग्रामसभेंत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
