सनबर्नाची तिकेट विक्री सुरू, कारवाय करात

भांगरभूंय | प्रतिनिधी

अमीत पालेकारः पणजी पुलीस स्टेशनार कागाळ दाखल

भांगरभूंय । प्रतिनिधी

पणजीः मुख्यमंत्री म्हणटा गोंयांत सनबर्नाक परवानगी दिवंक ना. तरी लेगीत सनर्बनान तिकेटी विकपाक सुरवात केल्या. हें सिध्द करपाक आपणे 2 हजारांची तिकेट बूक केल्या. हो फसवणुकीचो प्रकार, ते खातीर आयोजकां आड पणजे पुलीस स्टेशनाचेर कागाळ दाखल केल्या. जर सरकारा हे फटणुकेंत वांटेकार ना जाल्यार सनबर्न आयोजकांचेर कारवाय करची, अशी मागणी आम आदमी पक्ष गोंय संयोजक अमीत पालेकार हांणी केल्या. पालेकार हांणी हेर फुडाऱ्यां वांगडा सनबर्ना आड पणजी पुलीस स्टेशनांत कागाळ दाखल केली.

गोंयांत सनबर्न नाका म्हण लोकांचो विरोध आसा आनी तातूंत हो सनबर्न दक्षीण गोंयांत आयोजीत करपाचो यत्न चलयला. तरी लेगीत मुख्यमंत्री तांकां ‘बाबडे’ म्हणून तांचो हुस्को करता, असो आरोप पालेकार हांणी केला.

मुख्यमंत्र्यान सांगिल्लें अजून मेरेन सनबर्नाक परवानगी दिवंक ना. पूण ऑनलायन तिकेट विक्री चालू केल्या. 2,230 दिवन आपणे ही तिकेट विकती घेतल्या. तिकेट ईमेल करतले म्हूण सनबर्न सांगता. पूण परवानगी मेळचे आदींच सनबर्न तिकेटी कशे विकपाक शकता. ही एक व्हड भानगड आसपाक शकता. हे खातीर ही बूक केल्ले तिकेटीची फोटो कॉपी दिवन सनबर्न आयोजीत करपी पर्सेप्ट आनी बूक माय शो हांचे आड कागाळ नोंद केल्या. जुलयांत आपणे ही तिकेट घेतिल्ली. डिसेंबरांत सनबर्न जाता. आपले वरी कितल्याश्याच जाणांनी तिकेटी विकत्यो घेतल्यात आसतल्यो. पूण तांणी सनबर्नाचे थळ आनी तारीख निश्चीत करूंक ना. सनबर्न जातलो हाची कसलीच गॅरंटी ना. लाखांनी पयशे घेवन लोकांक आयोजक तोपी घालपाची शक्यताय आसा, अशी भिरांत पालेकार हांणी उक्तायल्या.

डिसेंबरांत जावपी सनबर्ना खातीर आतांच पयशे घेवपाक लागल्यात. इतल्या म्हयन्यां पयलीच पयशे घेवन आयोजक हाचेर जूर जोडपाक सोदतात काय कितें? जर लोकांचे पयशे बुडले जाल्यार सरकारूय हातूंत वांटेकार आसा अशें सिध्द जावन सरकारूच हाका जापसालदार आसतलें, अशें पालेकार हांणी म्हणलां. हे खातीर हो विषय भौशीक विशय म्हूण घेवन मुख्यमंत्री आनी पर्यटन मंत्र्यान हांचेर कारवाय करपाची गरज आसा. हे पयशे खंयच्या आयोजकान घेतल्यात, खंयच्या खात्यांनी जमा केल्यात हाची चवकशी करपाक पुलिशेक सांगपाक जाय, अशी मागणी पालेकार हांणी केली.