भांगरभूंय | प्रतिनिधी
– सगल्या खात्यांक दितले अचकींत भेटपणजीः सगल्या सरकारी खात्यांतल्या अधिकाऱ्यांनी आनी कर्मचाऱ्यांनी योग्य प्रशासना खातीर आपल्या वावराक न्याय दिवप म्हत्वाचें. कांय अधिकारी, कर्मचारी बरे काम करतात. पूण कांय कर्मचारी सुस्तेल्यात अशें मुख्यमंत्री डॉ. प्रमोद सावंत हांणी शेनवारा पत्रकारां कडेन उलयतना हे विशीं स्पश्टीकरण दिलें.
विधानसभेचें पावसाळी अधिवेशन सोंपता म्हणसर मुख्यमंत्री डॉ. सावंत हांणी शुक्रारा कुशळटाय विकास खात्याच्या पणजी मुखेल कार्यालयांत अचकीत भेट दिली. मुख्यमंत्र्याच्या अचकीत ‘एंट्री’क लागून अधिकारी आनी कर्मचारी भियेले. हे भेटींत मुख्यमंत्र्यानी खात्याच्या प्रशासनाचो, अधिकाऱ्यां कडल्यान येवजण्यो चालीक लावपाचो नियाळ घेतलो. आतां सावन आमी तुमचे कडेन आशिल्ल्या खात्यां सयत हेर सगळ्या खात्यांक भेट दितले. कुशळटाय विकास खात्या वरवीं तालुक्यांनी चलपी सरकारी एटीआयएन कडेनय अशीच भेट जातली अशें मुख्यमंत्र्यांनी सांगलें.
सरकारी येवजण्यो लोकां मेरेन पावोवपा खातीर सरकारी अधिकारी आनी कर्मचाऱ्यांची भुमिका म्हत्वाची. ते खातीर तांचे कडल्यान दर्जेदार कामगिरीची अपेक्षा आसता. राज्यांतले जायते सरकारी अधिकारी आनी कर्मचारी आपल्या कामाक फावो तो न्याय दिवन खात्याच्या येवजण्यांचो लोकांक फायदो करतात. पूण कांय अधिकारी सुस्तेल्यात. तांणी आपलें काम सारकें पुराय करपाची गरज आसा अशेंय मुख्यमंत्र्यानी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
