भांगरभूंय | प्रतिनिधी
-आंकडो वाडटोच, लोकसभेंत लेखी जापेंतल्यान म्हायतीपणजीः फाटल्या धा वर्सांत राज्यांतल्या 1,443 बायलांक थानां आनी गर्भाशयाच्या कॅन्सराक लागून मरण आयलें. केंद्रीय भलायकी राज्यमंत्री प्रतापराव जाधव हांणी लोकसभेंत प्रस्नाक लेखी जाप दितना दिल्ले आंकडेवारींतल्यान ही म्हायती मेळ्ळ्या. धा वर्सांत दोनूय प्रकारच्या कॅन्सरान पिडेस्त बायलांचें मरण प्रमाण वाडलां.
मंत्री जाधव हांणी दिल्ले आंकडेवारी प्रमाण, 2014 ते 2023 ह्या धा वर्सांत गोंयांतल्या 1,002 बायलांक थानांच्या कॅन्सराक लागून आनी 441 बायलांक गर्भाशयाच्या कॅन्सरान मरण आयलें. दोनूय प्रकारच्या कॅन्सरान मरण येवपी बायलांचो आंकडो दर वर्सा वाडत आसा. थानां आनी गर्भाशयाच्या कॅन्सराक लागून मरण येवपी बायलांचो आंकडो फकत गोंयांतच न्हय, जाल्यार देशांतल्या हेर राज्यांनीय वाडला अशेंय आंकडेवारींतल्यान दिसून येता.
मजगतीं, थानां आनी गर्भाशयाच्या कॅन्सराचेर नियंत्रण दवरपा खातीर भलायकी मंत्रालयान वेगवेगळे उपाय करपाक लागल्यात. ताचे खाला गोंय सयत सगल्या राज्यांक आनी केंद्रीय प्रदेशांक वर्सुकी निधीची वेवस्था सुरू आसा. ‘राष्ट्रीय भलायकी मिशन’ कार्यावळी खाला देशभर जागृताय कार्यावळी सुरू आसात. दरेका राज्यांतल्या हॉस्पिटलांनी दोनूय प्रकारच्या कॅन्सराचेर उपचारा खातीर गरजेच्यो सुविधा आनी आधुनीक तंत्रगिन्यान उपलब्ध करून दितात अशेंय मंत्री प्रतापराव जाधव हांणी जापेंत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
