भांगरभूंय | प्रतिनिधी
आलेक्स रेजिनाल्डः विरोध कराच, पूण टिका नाका
भांगरभूंय । प्रतिनिधी
मडगांवः सनबर्न हो खाजगी महोत्सव. वैयक्तीक तरेन आपलोय ताका विरोध आसा. सनबर्ना संबंदांत सध्या तरी आयडीसी कडेन कसलोच प्रस्ताव येवंक ना. आयडीसी म्हज्या बापायची न्हय. आपूण अध्यक्ष आसलों तरीय आयडीसी कडेन आयिल्ल्या प्रस्तावाचेर बोर्ड निर्णय घेता. विरोध आसल्यार विरोध निश्चीत करचो, पूण तो करतना दुसऱ्यांचेर टिका करूं नाकात, अशें मत आमदार तशेंच आयडीसी अध्यक्ष आलेक्स रेजिनाल्ड हांणी मांडलें.
रेजिनाल्ड हांणी सांगलें, लोकांची सेवा करचे खातीर आमदार जाला. सनबर्न हो खाजगी महोत्सव, ते खातीर ताका सरकाराची परवानगी लागता. आयडीसी कडेन किटला वाठारांतले सुवातेचो प्रस्ताव आयिल्लो, तो भायर मारला. हे आदीं सनबर्न उत्तर गोंयांत जातालो. त्या वेळार खूब जाण आपले कडेन पास मागपाक येताले. सनबर्नाक आपलोय विरोध आसा. फाटले विधानसभेंत जे लोक आपल्याचेर टिका करताले, तेच सनबर्ना वयल्यान गरजे भायली टिका करतात. कुडटरीचे रिव्होल्युशनरी गोवन्साचे लोक खंय आसात, लोकांच्यो समस्या आपुणूच सोडयतां. टिका केली जाल्यार लेगीत लोकांची सेवा करीत रावतलों, अशेंय तांणी स्पश्ट केलें.
देशा भायर रावप्यांनी शिकोवचें न्हयः रेजिनाल्ड
आयडीसीचे प्लॉट पळोवपा खातीर खूब जाण येतात. दरेकल्याक आपल्या परवानगेची गरज ना. जे गोंय सोडून गेल्यात ते आमकां लोकां खातीर कितें करचें, तें शिकोवपाक शकनात. आमी रातदीस लोकां खातीर काम करतात. रातीर- मध्यान रातीर कोणाचेय मजतीक धांवून वतात आनी हे फुडेंय वतले, अशें कुडटरीचे आमदार आलेक्स रेजिनाल्ड हांणी सांगलें.
कोयर प्रकल्प उबारपाचो प्रस्ताव
कोयर प्रक्रिया प्रकल्प उबारपा संबंदांत आयडीसीक लेगीत नेमावळ आसा. कोयराचो प्रस्न वाडचो न्हय हे खातीर सुको आनी ओल्या कोयराचेर प्रकिये खातीर सुविधा उपलब्ध आसची. ते प्रमाण प्रकल्प उबारपाचो प्रस्ताव आसा. सरकारान लोकांच्या म्हणण्या प्रमाण तीन विधेयकां फाटीं घेतल्यांत. ताका लागून लोकांक विरोध करपाचो अधिकार आसा, अशें आमदार आलेक्स रेजिनाल्ड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
