रेहबर खान खून प्रकरणः दुबावीत निलेश तुपकार हाका सशर्त जामीन

भांगरभूंय | प्रतिनिधी

म्हापशें, प्रतिनिधी ः सावळे, पिळर्णच्या रेहबर खुर्शीद अली खान (22, मुळ उत्तर प्रदेश) हाच्या खून प्रकरणांत दुबावीत निलेश आत्माराम तुपकार (सर्वेवाडो, गिरी) हाका म्हापशें अतिरिक्त जिल्लो सत्र न्यायालयान सशर्त जामिनाचेर सोडलो.
न्या. शर्मिला पाटील हांणी दुबावीत तुपकार हाची 50 हजार रुपया हमी रक्कम आनी त्याच रक्कमेच्या दोन हमीदारांचेर जामीन मंजूर केलो. न्यायालयांतल्या दरेक सुनावणेक हाजीर रावप, साक्षीदारांक भंय घालपाचो यत्न करप ना, न्यायालयाचे परवानगे बगर गोंयांतल्यान भायर वचप ना अशो अटी न्यायालयान ताका घाल्यात. हाचे आदीं न्यायालयान ह्या प्रकरणांत दुबावीत संदेश श्याम नायक (रा. फट्टावाडो नेरुल, मूळ गावळीवाडो काकोडा) हाका सशर्त जामीनाचेर सोडिल्लो.
न्यायालयांत दुबाविताचे वतीन अ‍ॅड. विनायक पोरोब हांणी आनी सरकारी पक्षाचे वतीन सरकारी अभियोक्ता आर. डिसोझा हांणी युक्तीवाद केलो.
मजगतीं, हो खून 16 एप्रिल 2024 दिसा रातीं जाल्लो. सावळे पिळर्ण, पर्वरेच्या ऑडिट भवना लागसार रस्त्यार रेहबराची कूड पुलिसांक गस्ती वेळार मेळिल्ली. ताची मान मोडिल्ल्यान तशेंच फाटीच्या कण्याक खर घावो जाल्ल्यान आनी खूब रगत गेल्ल्यान रेहबराक मरण आयिल्ले अशें पोस्टमॉर्टम अहवालांतल्यान स्पश्ट जाल्लें.
पुलीस तपासांत मोगीचो छळ केल्ल्या रागातल्यान मोगी दुबावीत विकास यादव (रा. कांदोळी) हाणें आपल्या 12 ते 15 वांगड्यांच्या मजतीन रेहबराचो खून केल्ल्याचें दिसून आयिल्लें. ते प्रमाण पुलिसांनी आयपीसीच्या कलम 143, 147, 342, 365, 392, 201, 302 आनी 149 खाला गुन्यांव नोंद केल्लो. ते प्रमाण 17 एप्रीलाक दुबावीत खतेश तुकाराम कांदोळकार, सुमन हेमंत बरिक, सचिन चंद्रीका सहानी, तनय सुब्राय कांदोळकार आनी सचिन नागेंद्र सिंग (सगळे रा. कांदोळी) आनी विकास यादव हांकां 19 एप्रिल दिसा जाल्यार आनंद सहदेव चिकलगेकार (मयडे व मूळ वाळपय), संतोष उमेश गावस (म्हापशें ) हांका 20 एप्रिलाक आनी संदेश नायक (नेरूल, मूळ काकोडा), निलेश आत्माराम तूपकार (गिरी) हांकां 25 एप्रिलाक अटक केल्ली. जाल्यार दुबावीत बिदेश (म्हापशें) अजून फरारी आसा.

ह्या प्रकरणात वापरिल्ली जीए 03 एएफ 7449 ही क्रेटा कार, जीए 03 एच 5200 ही पोलो कार, जीए 03 एएस 3920 आनी जीए 03 एएस 7208 या दुचाकी तशेंच कारींतल्यान मयताचे कपडे, ताचो मोबायल फोन, खून कतरपाक वापरिल्लो स्क्रू ड्रायव्हर आनी हेर हत्यारा जप्त केल्ली.
मजगतीं, रेहबर आपल्या सलूनाच्या कुशीक (चोगम रस्त्यार) मिनी सुपर मार्केटाच्या मालकणीचेर एकतर्फी मोग करतालो. तो तिका छळटालो तशेंच धमकी दिवन त्रास दितालो.
हें तिणें आपल्या इश्टाक, दुबावीत विकास यादवाक सांगलें. घडणुकेच्या आदल्या दिसा 15 एप्रीलाक रातच्या 10.30 वरांचे सुमाराक रेहबर त्या चलयेक मेळपाक आयलो तेन्ना ताका दुबावितांनी धरलो आनी मारपेट केली. ते उपरांत ताका थंयच रस्त्यार जखमी अवस्थेंत सोडलो आनी पळ काडलो. सकाळीं 2 वरांचे सुमाराक गस्त घालपी पुलिसांक रेहबराची कुड मेळ्ळी.