भांगरभूंय | प्रतिनिधी
बेंगळुरू, खबरां संस्था ः अर्थीक फटवणुकीचे कितलेशेच प्रकार सध्या मुखार येवपाक लागल्यात. स्कॅमर तरेतरेच्यो कल्पना वापरुन फटवणूक करतात. असोच एक प्रकार म्हळ्यार एका उच्च शिक्षण घेतिल्ल्या जोडप्याची 1.53 कोटी रुपयांची फटवणूक केल्या. पूण बेंगळुरूंतल्या ईस्ट डिव्हिजन सायबर क्रायम पुलिसांनी भितरले 1.4 कोटी रुपया परत मेळयले.
बेंगळुरू बनसवाडी रावपी सॉफ्टवेअर इंजिनियर जोडप्यांन चड परतावो मेळटलो ह्या हांयसान गुंतवणूक केल्ली. ही गुंतवणूक युकेंत चलपी घोटाळ्यांत केल्ली. ह्या घोटाळ्यांतल्यान मेळिल्ल्या पयशांचो गैरवापर करपा खातीर उत्तर भारतांतल्या लोकांनी बनावट खात्यांचें नेटवर्क वापरलें. तशेंच हो वेव्हार खरो दिसपा खातीर तांणी एक बनावट वेबसायटय तयार केल्ली. ह्या वेबसायटीचेर तांकां तांच्या गुंतवणुकींतल्यान मेळपी परताव्याची रक्कम दिसताली.
बनावट वेबसायटीन केले ब्लॉक
गुंतवणुकीचेर बरो परतावो मेळपाक लागला म्हणून ह्या जोडप्यान आपली खोशी उक्तायली. कांय म्हयन्यां उपरांत तांणी ह्या परताव्यातली कांय रक्कम काडपाचो यत्न केलो. पूण, बनावट वेबसायटीन तांकां ब्लॉक केले. ह्या वेबसायटी वरवीं तांकां पयशे काडपाक मेळनाशिल्ले. देखून हो प्रकार उजवाडाक आयलो. उपरांत तांची फटवणूक जालां हें कळटाच ह्या जोडप्यान रोखडेंच पुलिसां कडेन संपर्क केलो. बँकेच्या अधिकाऱ्यांच्या समन्वयान पुलिसांनी बारीकसाणेन चवकशी करून मनीट्रेल उक्ताडार हाडले. ह्या घोटाळ्यांत आस्पाव आशिल्ली 50 परस चड खातीं गोठयली. हे कारवायेक लागून लुकसाण जाल्ले चडशे पयशे परत वसूल जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
