भांगरभूंय | प्रतिनिधी
पणजी : सेलिन डायोनाचें ‘माय हार्ट विल गो आॅन’, एनरिके इग्लेशियसाचे ‘बायलांदो’, ब्रायन एडम्साचें ‘समर आॅफ 69’, ए आर रेहमानाचें ‘वंदे मातरम’ आनी हेर 17 वेगवेगळ्या भाशांतलीं 89 संवसारीक हीट पदां कोंकणींत आयकुपाची कल्पना करात. ही कोंकणी गीत सर्त संवसारीक हीट पदांचो आदार घेवन कोंकणी गितांक (लिरीक्स) उर्बा दिवपाक आयोजीत केल्या. ते खातीर आपलें गीत धाडपाची निमणी तारीख 31 आॅगस्ट आसा. पूण खंयचें गीत बरयतलें तें 20 आॅगस्ट मेरेन कळोवचें. पांडववाडो, चोडणांच्या उजुर्बा टेक्नोलाॅजिक्स एलएलपीन ही सर्त आयोजीत केल्या.
तुमच्या आवडट्या संवसारीक हीट पदा खातीर कोंकणी लिरीक्स बरयता, हे संकल्पने खाला आयोजीत केल्ले हे सर्तीं खातीर 117 पदां मेळ्ळ्यांत. तातूंत गायक, दोतोर, उद्देजक, गृहिणी, शिक्षक सगले आसात. मेरशी आनी वास्कोंतल्यान सगल्यांत चड प्रवेशिका आयल्यात.
हीं पदां शब्दश: अणकारीत करचीं न्हय. तर ताचो सार तातूंत येवचो. कोंकणीची खंयचीय बोली, शैली वापरुं येता. पदां देवनागरी वा रोमी लिपींत धाडचीं. जैतिवतांक युनिरायझ रिसर्च फावंडेशना वतीन आकर्शक इनामां दितले. चडांत चड पांच गीतां धाडूं येतात.
चड म्हायती खातीर +91- 9765410020, www.vangdda.org, [email protected] हांगा संपर्क करचो. नोंदणी अर्ज आनी हेर सगली म्हायती www.vangdda.org वेबसायटीचेर आसा, अशी म्हायती व्हिन्सेंट पाॅल तोस्कानो हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
