भांगरभूंय | प्रतिनिधी
केळशेचे बसकेंत थळाव्या टॅक्सीकारांची मागणी
भांगरभूंय । प्रतिनिधी
मडगांवः केळशी पंचायतींत विशेश सभा घेवन थळाव्या टॅक्सीकारांच्या प्रस्नांचेर चर्चा केली. ह्या वेळार गोवा मायल्सान स्टॅण्डा वयलें भाडें घेवन वच्चें न्हय. हेर कडेन भाडें मारपाक हरकत ना, पूण वाठारांत गाडी पार्क करून दवरची न्हय. तशेंच हॉटेल वेवस्थापनांनी लेगीत स्टॅण्डा वयल्या गाडयांक प्राधान्य दिवचें, अश्यो सुचोवण्यो टॅक्सीकारां कडल्यान केल्यो. पंचायती वतीन हे संबंदांत राज्य सरकारा कडेन चर्चा करपाचें आस्वासन सरपंच डिक्सन वाझ हांणी ह्या वेळार दिलें.
केळशी पंचायतीच्या सभाघरांत शुक्रारा सकाळीं टॅक्सीकारांची बसका जाली. तातूंत हॉटेव वेवस्थापनां कडल्यान बस, टॅक्सी ऑनलायन बूक करपी पर्यटकांनी गाडी बूद केल्ल्याचें सांगतात. हॉटेलांनी लग्न, परिशदो वा हेर इव्हेंट जातात, पूण थळव्या टॅक्सीकारांक ताचो फायदो जायना. ताचें भाडें दुसऱ्याक कोणाक तरी मेळटा. हॉटेलांनी रॅस्टोरंण्ट, कुडी, स्पाचो वेवसाय करचो. टॅक्सीकारांच्या वेवसायाचेर तांणी अन्याय करचो न्हय. हॉटेल धनयांक लेगीत खरी परिस्थिती खबर आसा, पूण हॉटेल वेवस्थापना कडल्यान योग्य निर्णय घेनात. थळाव्या टॅक्सीकारांचो वेवसाय संरक्षीत करपाची गरज आसा. ते खातीर गोवा मायल्सा वांगडा चर्चा करपाची मागणी बसकेंत केली.
सरपंच डिक्सन वाझ हांणी सांगलें, थळावी टॅक्सी आनी ऑनलायन टॅक्सी हातूंत फरक आसा. थळाव्या कडल्यान नितळ गाडी, बरी सेवा, सुरक्षा मेळटा ती दुसरे कडेन मेळना. म्हारग हॉटेलांनी रावपी पर्यटकांक भाड्या संबंदांत कसले विशय आसतले, अशें दिसना. फरक सल्यार चडांत चड 500 रुपयांचो आसूं येता, पूण त्या पर्यटकां खातीर तें म्हारग न्हय. गोवा मायल्सवालो गिरायकां कडेन वाद घालतात, पूण थळावे टॅक्सीकार तशे करिनात. एकादी वस्तू उरली जाल्यार थळावे टॅक्सीकार ती परतून दितात. तांचेर कसलेच गुन्यांव नोंद नात. सगळ्या सरपंचांनी थळाव्या टॅक्सीकारांच्या फाटल्यान रावचें. पर्यटन खात्या कडल्यान गिरायकांक जाय तें घेवपाचो पर्याय आसचो, अशें सांगतात. दर्यादेग वाठारांतले भाडें व्हरचें न्हय, अशी विनवणी गोवा मायल्सा कडेन केल्या. पुलिसां कडेन लेगीत आदार मागला. ह्या वाठारांत लोकांक लागून हॉटेलां बांदल्यात. तांकां ताचो फायदो जावपाची गरज आसा, अशें मत डिक्सन वाझ हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
