भांगरभूंय | प्रतिनिधी
सरकार घेतलें धोको निर्माण करपी पालसणांचो सोद
पणजी, प्रतिनिधी : राज्याच्या खयच्याय वाठारांत दोंगर कापणी सुरू आसल्यार जिल्होधिकार्याक म्हायती दिवपाची जापसालदारी आतां तलाठ्याची आसतली. तलाठ्यान म्हायती दिल्या उपरांत खासा पंगड दोंगर कापणीचेर कारवाय करतलो. धोकादायक पालसाणांचो सरकार सोद घेतले, अशें मुख्यमंत्री डॉ. प्रमोद सावंत हांणी सांगलें.
वायनाड सारखी घडणूक गोंयांत जावची न्हय म्हूण सरकारान जतनाय घेवपाक सुरवात केल्या. हाचे खातीर अधिवेशन सोंपल्या उपरांत आपत्ती वेवस्थापन समितीची बसका घेतले, अशें मुख्यमंत्र्यानी सांगलें.
धोको निर्माण करपी पालसाणांचो सोद घेवन सुरक्षिततायेचे उपाय सुचोवपा खातीर सरकारान २०२२ वर्सा समिती स्थापन केल्ली. हे समितीक ३ म्हयन्यांची मुजतवाड दिल्या. हे समितीन २०२२ वर्सा अहवाल सादर केला. आपत्ती घडची न्हय म्हूण भौशीक बांदकाम, रानां, नगरनियोजन, पंचायत, नगरपालिका खात्यांक मुखेल सचिवां वरवीं मार्गदर्शक तत्वां जारी जातलीं. राष्ट्रीय आपत्ती वेवस्थापन प्राधिकरणाचे मजतीन धोक्याची पुर्व कल्पना दिवपी यंत्रणां तयार जातलीं. येवपी शुक्रारा आपत्ती वेवस्थापनाचेर विचार मंथन कार्यशाळा अधिकार्यां खातीर जातली.
पालसणां विशीं जतनाय घेवपा सयत सुरक्षा उपायां खातीर मामलेदार तशेंच रानां खात्याच्या अधिकार्यांक प्रशिक्षण दितले.
हाचे पयलीं सत्तरी, मुरगांव म्हालांत पालसाणां कोसाळपाच्यो घडणुको घडल्यात. पालसणां कोसाळपा फाटलीं कारणां समितीन अहवालांत नमूद केल्यां, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
