भांगरभूंय | प्रतिनिधी
जोयडाः दक्षीण पश्चिम रेल्वे विभागातल्या लोंढा- वास्को रेल्वे मार्गाचेर सोनाळी ते दुदसागर मदल्या बोगदो क्रमांक 15 लागसार सकाळीं सुमार 10.30 वरांचेर म्हाल गाडयेचे १७ डबे रुळा वयल्यान निसरले. हाका लागून लोंढा – गोवा रेलसेवा ठप्प जाली. जायत्यो रेल्वे रद्द केल्यात आनी कांय प्रवासाचे मार्ग बदलल्यात.
सकाळीं कोळसो व्हरपी म्हालगाडी कर्नाटकाचे वटेन वताली. हे खेपे सकाळीं 10.30 वरांचे सुमाराक दुदसागर- सोनाळी हांचे मदल्या 15 क्रमांकाच्या बोगद्या लागसार ती रुळा वयल्यान निसरली. हांतूत 17 डबे रुळा वयल्यान निसरले आनी एक डबो देगणांत पडलो अशी म्हायती मेळ्ळ्या. ते खातीर म्हायती मेळटाच रेल्वे अधिकारी रोखडेंच घडणूक सुवातेर धांवले.
ह्या अपघाताक लागून रेल्वेमार्गाचो पुराय इबाड जाला आनी तो दुरुस्त करपाक वेळ लागतलो. ह्या मार्गांतल्यान वचपी वास्को दी गामा- तिरुपति- हैदराबाद विकली एक्सप्रेसाचो मार्ग बदलून मडगांव -कारवार – पडील सुब्रह्मण्यम मार्गा वयल्यान वळयल्यात. वास्को दी गामा – हजरत निजामुद्दीन एक्सप्रेस रोहा, पनवेल मार्गांतल्यान चलतली. आयज चलपी यशवंतपूर-वास्को ट्रेन रद्द केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
