भांगरभूंय | प्रतिनिधी
पणजी ः राज्य विधानसभेचें पावसाळी अधिवेशन सोंपता म्हणसर मंत्री आनी आमदारांची दिल्ली भोंवडी सुरू जाल्या. काँग्रेसीचे आमदार कार्लुस फेरेरा दिल्लींत गेल्ल्यान चर्चा सुरू जाल्या.
मंत्री रोहन खंवटे, सुभाष फळदेसाय, आलेक्स सिक्वेरा हांचे वांगडा मगोचे आमदार जीत आरोलकार आनी काँग्रेसीचे आमदार कार्लुस फेरेरा हे सध्या दिल्लींत आसात. काल (बिरेस्तारा) मंत्री फळदेसाय आनी आमदार जीत आरोलकार हांणी खासदार सदानंद शेट तानावडे हांची दिल्लींत भेट घेतली. संसदेचें काम कशें चलता तें पळोवपाक आनी केंद्रांतल्या दोन मंत्र्यां कडेन बसका घेवपाचीय वेवस्था करपाक तानावडे हांणी म्हाका आमंत्रण दिल्लें. ह्याच हेतून आपूण दिल्लींक आयिल्लो अशें जीत आरोलकार हांणी सांगलें. पूण, काँग्रेसीचे आमदार फेरेरा दिल्लींक नेमको कित्याक गेला हाची म्हायती मेळूंक ना. आयज वा फाल्यां आनीक एक मंत्री दिल्लींक वचूं शकता अशी म्हायती सूत्रांनी दिल्या.
मजगतीं, पावसाळी अधिवेशन सोंपताच राज्य मंत्रीमंडळांत बदल जातलो आनी दोन ते तीन मंत्र्यांची नेमणूक जातली असो संकेत मुख्यमंत्री डॉ. प्रमोद सावंत हांणी अधिवेशना पयलीं दिल्लो. हे फाटभुंयेर मंत्री आनी आमदार दिल्लींक भेट दिवपाक सुरवात केल्ल्यान राज्यांतल्या व्हड राजकी बदलांची चर्चा नेटान वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
