भांगरभूंय | प्रतिनिधी
बरेली, खबरां संस्था: उत्तर प्रदेशच्या बरेली जिल्ह्यांतल्या गांवगिर्या वाठारांत फाटल्या १४ दिसांनी णव बायलांचे खून जाले उपरांत ह्या वाठारांत अनवळखी सिरियल किलरचो भंय पातळ्ळा. त्या णवूय बायलांचो खून एकेच तरेन जाल्ल्यान हाचे फाटल्यान सिरियल किलर आसतलो असो अदमास आसा. बरेली गांवगिर्या वाठारांत २५ किमीच्या वाठारांत आनी दोन पुलीस ठाण्यांचे हद्दींत येवपी गांवांत हे गुन्यांव जाल्ल्यान ह्या वाठारांतल्यान लोकां मदीं भंय पातळ्ळा.
उत्तर प्रदेशचे पुलीस महासंचालक हांणी सांगलें, सगळ्यो पिडेस्त बायलो ४५ ते ५५ हे पिराये मजगतच्यो आसात. शेतांत गळो दामून बायलांचो खून जाला. तांच्या आंगावेले कपडे विस्कटलेले पळोवपाक मेळ्ळे. मात कोणाचेरूच लैंगीक अत्त्याचार जाल्लो दिसूंक ना. सगळ्या खुनांची तरा तशीच आशिल्ल्यान आमी हें काम सिरियल किलराचें आसतलें हें न्हयकारपाक शकनात, अशें तांणी सांगलें.
पुलिसांनी ९० गांवांनी चवकशी केले उपरांत तीग दुबावितांचे स्कॅच काडल्यात. ह्या गुन्यांवांची सुरवात जून म्हयन्यांत जाली. तेन्ना पयले बायलेची कूड सांपडली. ताचे उपरांत आतां णववे बायलेची कूड ३ जुलयाक सांपडल्या. ह्या सगळ्या खुनां मदीं एक सारकीच पद्धत आसा. गळो दामून खून केलो आनी कूड काडून शेतांत उडयली. मात एकेय बायलेचेर लैंगीक अत्त्याचार जावंक ना.
तिगांक अटक मात
पुलिसांनी तीग दुबावीतांक अटक केल्या. मात ते तिगून खरे गुन्यांवकार आसचे ना. असो तपास यंत्रणाक दुबाव आसा. कारण ते बंदखणींत आसतनाय खून जाल्यात. ताका लागून पुलीस आतां हालींच जामीन मेळिल्ल्या वा ख्यास्त सोंपून सुटिल्ल्या कैद्यांचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
