भांगरभूंय | प्रतिनिधी
-म्हालेखापाल अहवालांतली म्हायतीपणजी : गोंय वैजकी म्हाविद्यालय तशेंच भलायकी खात्याच्या गुदांवा भायर वखदां उडयिल्ली आसात. वखदां योग्य तरेन दवरूंक नात, असो म्हालेखापाल अहवालांतलो निश्कर्श आसा. मुख्यमंत्री डॉ. प्रमोद सावंत हांणी अधिवेशनाच्या निमणे दिसा म्हालेखापालांचो अहवाल सभाघरांत सादर केलो.
वखदां तशेंच इंजेसांव दवरपा खातीर एफडीएसआयची मार्गदर्शक तत्वां आसात. ह्या मार्गदर्शक तत्वां प्रमाण वखदां दवरची पडटात. गोंय वैजकी म्हाविद्यालय तशेंच भलायकी संचालनालयाच्या गुदांवांत योग्य तरेन वखदां दवरनात. गुदांवा भायरच्या गॅलरींत वखदां दिश्टी पडिल्ल्याचो उल्लेख अहवालांत आसा.
मे 2022त गोंय वैजकी म्हाविद्यालयांतल्या फार्मसींची पळोवणी केली. वखदां दवरपाचो गुदांव नितळ नाशिल्लो. वखदां जमनीचेर उडयिल्ली आशिल्ली. गुदांवा भायर गॅलरींत वखदां आशिल्लीं. वखदांच्या गुदांवांनी कागदपत्रां दवरिल्ली आशिल्ली. गोंय वैजकी म्हाविद्यालयाच्या डीनाचे नदरेक ही गजाल हाडून दिली. गुदांवांची दुरुस्ती करून वखदां दवरपा खातीर वेवस्था करपाचें उतर तांणी दिले.
——————–
काणकोण, फोंडें भलायकी केंद्रांत
वखदा दवरपा खातीर वेवस्था ना
फोंडें हॉस्पिटलांत वखदां गुदांवातल्या जमनीचेर तशेंच भायर कशाय कशी उडयिल्ली आशिल्ली. मिथीलेटेड स्पिरीट (ज्वालाग्रही) च्यो बाटल्यो हेर वखदा लागी दवरिल्ल्यो. हाका लागून उजो लागपाचो धोको आसा.
पेडणें आनी काणकोण भलायकी केंद्रांत गुदांवांत दवरिल्ल्या वखदांचेर नांवांची लेबलां नाशिल्लीं. काणकोण भलायकी केंद्रांत वखदांची बॉक्सां जमनीर उडयिल्ली आशिल्ली. पेडणें भलायकी केंद्रांतली स्थिती लेगीत अशीच आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
