भांगरभूंय | प्रतिनिधी
पणजीः गोंयांत फाटल्या चार वर्सांत दिसाक सरासरी 38 हजार 932 सोऱ्याच्या बाटल्यांची विक्री जाल्या. हे विक्रींतल्यान अबकारी कर स्वरुपांत सरकाराक दिसाक सरासरी 40 लाख रुपया मेळ्ळ्यात. मुख्यमंत्री डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार कार्लोस फेरेरा हांणी अतारांकूत प्रस्न उपस्थीत केल्लो.
जापेंत दिल्ले म्हायती प्रमाण, गोंयांत 2020- 21 ते 2023- 24 ह्या काळांत गोंयांत वट्ट 5 कोटी 68 लाख 41 हजार 215 सोऱ्याच्या बाटल्यांची विक्री जाल्या. 2023- 24 त सगळ्यांत चड 1 कोटी 72 लाख 38 हजार 72 बाटल्यो खपल्यो. 2022- 23 त 1 कोटी 71 लाख 62 हजार 156 बाटल्यांची विक्री जाल्ली. 2021- 22 त 1 कोटी 18 लाख 29 हजार 672 जाल्यार 2020- 21 त सगळ्यांत उणी म्हणल्यार 1 कोटी 6 लाख 13 हजार 715 बाटल्यांची विक्री जाल्ली.
ह्या बाटल्यांचे विक्रींतल्यान सरकाराक चार वर्सांत अबकारी कर रुपांत 598.02 कोटी रुपया महसूल मेळ्ळा. 2023- 24 त सगळ्यांत चड 183.62 कोटी रुपया महसूल मेळ्ळा. 2022- 23 त 182.38 कोटी रुपया, 2021- 22 त 123.03 कोटी जाल्यार 2020- 21 त 100 कोटी रुपया महसूल ह्या सोऱ्याच्या बाटल्यांचे विक्रींतल्यान अबकारी कर म्हूम मेळ्ळा, अशें जापेंत म्हणलां. जापेंत दिल्ले म्हायती प्रमाण, एप्रील 2020 ते जून 2024 ह्या काळांत गोंयांतल्या विवीध शीम तपासणी नाक्यांचेर बेकायदेशीर तरेन व्हरपी 94 हजार 489 लिटर सोरो जप्त केला. ह्या काळांत 2023- 24 त पत्रादेवी सगळ्यांत चड 24 हजार 471 लिटर सोरो जप्त केला. जाल्यार ह्याच नाक्यार 2022- 23 त 18 हजार 551 लिटर सोरो जप्त केल्लो. वयल्या काळांत बिहार आनी गुजरात राज्यांत गोंय बनावटीचो 5,496 लिटर सोरो जप्त केला, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
