आदिवासी दिसा निमतान प्रश्नमंजुशा सर्त

भांगरभूंय | प्रतिनिधी

पणजी, प्रतिनिधीः गोंय एसटी/ एससी आयुक्तालय आदिवासी दिसाच्या निमतान 9 वी ते बारावी मेरेनच्या विद्यार्थ्यां खातीर भगवान बिरसा मुंडा हांचेर फाल्या (शुक्रारा) प्रश्नमंजुशा सर्त घडोवन हाडटलें. पणजेच्या इन्स्टीट्युट मिनेझीस ब्रांगाझा हांगासर ही सर्त जातली, अशी म्हायती गोंय एसटी आनी एससी आयुक्तालयाचे अध्यक्ष दीपक करमळकार हांणी दिली.
गोंयात आदिवासी दीस मनोवपा विशीं गोंय एसटी एससी आयुक्तलायन पणजे पत्रकार परिशदत घेतिल्ली तांतूत दिपक करमळकार हांणी कार्यावळीची म्हायती दिली. तांचे वांगडा आदिवासी कल्याण संचालक दशरथ रेडकार हाजीर आशिल्लें.
9 ऑगस्ट हो दिस दर वर्सा संसारातल्या आदिवासी लोकांचो आंतरराष्ट्रीय दीस म्हूण मनयतात. हो दीस भारतांत आदिवासी दीस वा संसारीक आदिवासी दीस म्हूण मनयतात. देखून तो गोंयात मनोवचो म्हूण गोंय एसटी एससी आयुक्तालयान निर्णय घेतला, अशी म्हायती करमळकार हांणी दिली.
ह्या कार्यावळी दिसा आयुक्तालय गोंयच्या सगळ्या उच्च माध्यमिक शाळां खातीर प्रश्नमंजुशा सर्त घडोवन हाडटलें. शुक्रारा सकाळी 9.30 ते दनपारा 1.30 वरां मेरेन ही सर्त चलतली. ‘भगवान बिरसा मुंडाः स्वातंत्र्य चळवळ आनी आदिवासी हक्का खातीरचें जीवन आनी योगदान’ ह्या विशयाचेर ही सर्त जातली. दरेक उच्च माध्यमिक शाळेतले फकत 3 विद्यार्थी हे सर्तींत वांटेकार जातले आनी तांतूतले 2 विद्यार्थी हे एसटी वा एससी वर्गातले आसपाक जाय आनी 1 विद्यार्थी खंयच्याय वर्गातलो आसपाक शकता. तांचे बरोबर शिक्षक हजर आसपाक जाय, अशी म्हायती अध्यक्षान दिली.
पयली सुवात मेळोवपी पंगडाक रु. 20,000, दुसरें रु. 15,000 आनी तिसरें सुवातेर रु. 10,000 इनामां भेंटयतलें. तशेंच पयले आनी दुसरें उत्तेजनार्थ पंगडाक दरेकी रु. 5000 इनामां भेटोवन सगळ्यांक पारितोषिक दितले. प्रेशका खातीर खासा इनामां आसतली, अशेंय अध्यक्षान सांगलें.
मुख्यमंत्री तशेंच आदिवासी कल्याण मंत्री दो. प्रमोद सावंत हे मुखेल सोयरे म्हूण कार्यावळीचे उक्तावण करतले आनी सभापती रमेश तवडकार हे मुखेल सोयरे म्हूण इनामां वाटप करतले. शिक्षण संचालक शैलेश झिंगडे हे मानाचे सोयरे म्हूण हजर आसतले.