भांगरभूंय | प्रतिनिधी
पॅरीस, खबरां संस्था: एके वटेन ऑलिंम्पिकाचे निमाणे कांय दिसूच उरल्या. खुबश्या खेळांनी भारताची पदक मेळपाची आस्त उणी जावपाक लागल्या. अशें आसतनाच दुसरे वटेन एका खेळगड्या आड कायदेशीर कारवाय केल्ल्यान भारताक लज जाल्या. उरिल्ल्या दिसांनी कांय खेळगड्यांचेर भारताची पदकां खातीर आस्त आसा. मात पयलेच फावट ऑलिंम्पिक सर्त खेळपी भारताच्या पैलवानाचेर निमाणे फेरयेंत पॅरीस ऑलिंम्पीक वेवस्थापनान कारवाय केल्या.
नेमकें कितें घडलें?
अंतिम पांघाल हिचेर ऑलिंम्पिक वेवस्थापनान घालून दिल्ले नेम पाळूंक नाशिल्ल्याचो आरोप केला. धक्को दिवपी गजाल म्हळ्यार हे नेम मोडिल्ले खातीर पांघालाचे भयणीक पॅरिस पुलिसांनी ताब्यांतूय घेतिल्लें. चवकशी केले उपरांत तिका सोडली. आॅलिम्पीक वेवस्थापनान अंतिम पांघाल हिका फुडल्या सामन्यां खातीर अपात्र थारायलें आनी स्पोटर्स स्टाफा सयत तिका भारतांत धाडली.
पॅरिसांत ऑलिंम्पीक गेम्स व्हिलेजांत सगळ्यो सर्ती खेळयतात. हांगाच खेळगड्यांची रावपाचीय वेवस्था केल्या. ताका लागून खेळगडे, तांचो सपोर्ट स्टाफ आनी हेरां खातीर कांय नेम घाल्यात. ते मोडल्यार वेवस्थापन कारवाय करता. ऑलिम्पीक गेम्स व्हिलेजींतल्यान स्वताचें कांय सामान हाडपा खातीर अंतिमान आपले भयणीक धाडिल्ली. ऑलिम्पिक गेम्स व्हिलेजींत वेवस्थापनान दिल्ल्या पासां बगर कोणाक प्रवेश दिनात. निशा कडेन अंतिम पांघालचो पास पळोवन पुलिसांक दुबाव आयलो आनी तांणी तिका ताब्यांत घेतली.
निशाची चवकशी केले उपरांत पॅरीस पुलिसांक सगळें स्पश्ट जालें. हाचे उपरांत पुलिसांनी निशाक सोडलें खरें, मात खेळगडो आशिल्ल्याचो पास अंतिम पांघाल हांणी दुसरे व्यक्तीक वापरपाक दिल्ल्यान हें नेम मोडपाचें प्रकरण पुलिसांनी खर मानलें. तांणी ही खबर आॅलिम्पीक वेवस्थापनाक कळीत केली. तांणी अंतिमाक सर्तींतल्यान सरळ अपात्र करून थंयच्यान वचपाक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
